أخطاء بتدمّر علاقتك بأبناءك من غير ما تحس

أخطاء تدمر علاقتك بأولادك وانت مش واخد بالك

كلنا عايزين مصلحة ولادنا، كلنا لما بنيجي نوجهه أطفالنا بنوجههم علشان مصلحتهم، بس المشكله ان في مجموعة نقاط ممكن نبقى بنعملها بطريقه غلط تدمر علاقتنا بالطفل ده

هنتكلم في المقال ده عن مجموعة نقاط، لو بتعملها خلي بالك ما تعملهاش، او ابحث عن حلول تانيه، او طرق بديله تتعامل من خلالها مع طفلك أو مع ابنك في البيت.

أولاً: إعطاء الأوامر الكيفية

اول غلط بنقع فيه هو إعطاء الأوامر الكيفية، يعني ايه الاوامر الكيفية؟ يعني ادي للطفل أوامر من غير ما افسر، اقوله مثلا اعمل كذا طب ليه؟ لا من غير ليه اعمل كده وخلاص، علمته ده ليه؟ لا ما علمتوش

زي مثلا ايه؟ طفل قلتله اغسل أسنانك، ليه اغسل سناني؟ اغسل أسنانك وخلاص، هو كده انا ما فهمتوش أن غسيل الأسنان هيحافظ على نظافة أسنانه ويحميه من التسوس ويحميه من كذا من كذا من كذا ويبعد عنه كذا وكذا وكذا، انا ما فهمتوش الكلام ده.

الاوامر الكيفية مشكله كبيره جدا، لو جيت تتخيل نفسك في الموقف ده ان حد بيعاملك بالطريقه دى وبيقول لك اعمل كده من غير ليه هو كده وخلاص، انت هتحس بعدم احترام او نوع من الإهانة، وده نفس اللي الطفل بيحسه، مفيش حاجه اسمها ده طفل صغير مش فاهم، لا هو فاهم وبيحس، كمان كثرة الأوامر يحرم الطفل من فرصة بناء المعايير، الطفل مش هيقدر يبني لنفسه معايير يقيم من خلالها سلوكه بعد كده، لأنه ببساطه مش فاهم هو ليه بيعمل ده او ليه ما يعملش ده

ثانياً: التهديد

انك بتهدد الطفل سواء بالضرب أو بحرمانه من حاجه او التهديد المعنوي زي الابتزاز العاطفي: لو معملتش كده مش هحبك، لو عملت كذا هحبك

التهديد بكل اشكاله ليه نفس التأثير السلبي، بيخلي الطفل يحس بالاهانة، و بيخليه مش مطمن وهو موجود معاك في البيت.

ثالثاً: كثرة الوعظ والنصح

من اكتر الحاجات اللي بتدمر العلاقة ما ينفعش كل فترات جلوسك مع الطفل تبقى: اعمل كذا، ما تعملش كذا، المفروض تعمل كذا. الطفل هيزهق منك، و يبدأ ينفر من القعده معاك، وممكن يوصل لمرحلة انه يخبي عنك كل حاجه

الحل؟ قسم وقتك جزء من وقتك توجيه ونصح، وجزء تاني لعب وكلام عادي وحكي ومشاركة.

رابعاً: إصدار الأحكام

طول الوقت تقول له: انت غبي، انت كسلان، انت فاشل الكلام ده مش بيعدي… ده بيثبت جواه و يؤثر عليه نفسياً بشكل كبير، لازم تفهم انك مش قاضي، وما تتعاملش معاه على اساس انك بتحكم عليه.

خامساً: اللوم المستمر

ما ينفعش طول الوقت تلوم الطفل هو لسه بيتعلم، ودورك انك تعلمه ودوره انه يغلط عشان يتعلم.

سادساً: المقارنة

المقارنة من اخطر الحاجات ما ينفعش تقارنه باخوانه أو بابن خالته أو أي طفل تاني المقارنة بتدمر ثقته بنفسه وتخلي حالته النفسية اسوأ

توضيح مهم

مش معنى الكلام ده انك تسيب الطفل يعمل اللي هو عايزه لكن المطلوب انك تغير الطريقه اللي بتوجه بيها الطفل.

سابعاً: الصراخ (الزعيق)

الصراخ من أكبر المشاكل بيعمل رابط سلبي عند الطفل

يعني مثلا: لو الطفل حصل على درجات منخفضة وانت صرخت فيه، الطفل هيربط بين الصراخ وبين الفشل وبالتالي اي صوت عالي بعد كده هيخليه يفتكر نفس الشعور وده بيأثر على نفسيته بالسلب.

الحل

نشوف فيديوهات تعديل السلوك، نتعلم ازاي نستخدم الفنيات ونتعلم ازاى نعزز السلوك الصح وازاي نتعامل مع السلوك الغلط.

كده احنا اتكلمنا عن اهم الاخطاء اللي ممكن تدمر علاقتك بطفلك، ولو قدرت تتجنبها وتستخدم طرق صح هتفرق معاك جداً في التعامل معاه 👍