أخطاء تقلل تحسن طفلك في جلسات التخاطب
اولا: التركيز على التدريبات بشكل تقليدي
تدريبات تقليدية بمعنى ايه؟ الاطفال في السن الصغير مش يستجيبوا للأوامر المباشرة أو للتدريبات المكرره، مينفعش اكرر التدريب معاه ولا ينفع اديله أوامر
طيب بيستجيبوا ازاي؟ يستجيبوا من خلال اللعب، من خلال الحركة، من خلال التفاعل، هتلاقي ان الطفل متجاوب معاك وبيديك استجابات كتير جدا اغلبها بيكون صح.
يبقى مينفعش الجلسة تتحول لوقت ممل، والا الطفل يفقد حماسه للجلسة وهتلاقي انه ولا عايز يشتغل ولا عايز يستجيب ولا بيديك اي حاجه في الجلسة.
ثانيا: تطبيق نفس الطريقة مع كل الاطفال
وده ناس كتير بتقع فيه، ما فيش طفل زي التاني، وكل طفل حالة خاصة لازم اشتغل معاه بطريقه معينه، لازم يكون له خطه تدريبيه خاصه بيه هو، وأساليب تدريبيه متفصله على شخصيته وعلى طريقة استجابته.
ماينفعش اخد طريقة واحدة واطبقها على كل الاطفال في طفل ممكن يشتغل معاك بالصور، طفل تاني بالمجسمات، طفل ثالث محتاج حركة وتفاعل وأنشطة حركية، كل طفل وله طريقة ودورك انك تشوف ايه اللي بيجذب الطفل ده وايه اللي بيحفزه وتستخدمه، خليك مبتكر، كل حاله جديده محتاجه تفكير جديد.
ثالثا: إهمال دور الأهل
مينفعش الطفل ياخد جلسه نصف ساعه او ساعه ويرجع البيت من غير ما الاهل يعرفوا يعملوا ايه باقي اليوم الطفل في البيت، فلازم تدرب الأهل على الشغل معاه بعد كل جلسة او جلستين، وضح للاهل الهدف وازاي يشتغلوا عليه، اشرحلهم الأنشطة. ولو معندهمش ادوات، ادّيهم بدائل بسيطة من البيت، زي استخدام مكرونه وخيط بدل أدوات لضم الخرز.
لازم تبقى فاهم ان تدريب الاهل جزء أساسي من نجاح اي خطه تدريبيه وكمان ده هيفيدك كاخصائي، لان لما الطفل يتحسن والأهل يستفيدوا، اسمك ينتشر وهيجيلك حالات اكتر.
رابعا: التسرع في النتائج
ناس كتير عايزه نتيجه سريعه، لكن في حالات محتاجه وقت وصبر. الاستعجال ممكن يخلي الاخصائي يهمل خطوات مهمة، وده هيأثر على الطفل بعد كده في مهارات لازم تتبنى مرحله مرحله، ولو اتخطتها هتعمل فجوة عند الطفل في المستقبل
فلازم تمشي خطوه بخطوه، حتى لو النتائج بطيئه.
خامسا: التركيز على النطق فقط
اطفال كتير مشاكلهم مش في النطق فقط لكن عندهم مشاكل في الانتباه، والتركيز، والإدراك، والتواصل البصري، والتفاعل الاجتماعي.
لو ركزت على النطق فقط الطفل ممكن يتكلم لكنه مش فاهم هو بيقول ايه
أو يبقي طفل بيقول كلمات كتير، بس مش في سياقها ولا فاهم معناها علشان كده لازم تشتغل على كل الجوانب مع بعض.
الخلاصة
الجلسه مش مجرد مكان الطفل بيروحه علشان يتكلم شويه، الجلسه الصح بتكون تواصل، لعب، تدريب، اشراك للأهل، وصبر على النتائج وده الفرق بين جلسه بتعدي وخطة علاج فعالة بتغير حياه الطفل.