علشان نعدل سلوك الطفل لازم نمشي على خطوات عملية معينة:
اول خطوة عندنا هي تحديد السلوك: يعني نحدد السلوك اللي فيه مشكلة او اللي محتاج تعديل ولو الطفل عنده اكثر من سلوك مزعج او اكثر من سلوك عايز تعديل هبدأ بالسلوك الاقوى او السلوك الذي يسبب ضرر أكبر لك ولطفلك.
هختار السلوك ده وأحدده وبعد كده هبدأ أقيس عدد مرات تكرار السلوك
يعني ايه الكلام ده؟
يعني مثلا لو الطفل عنده سلوك العض أو يضرب، يبصق، بيعمل اي حاجة من الحاجات دى هبدأ احدد السلوك ده بيتكرر كم مرة في اليوم وابدأ أقيس عدد المرات اللي حصل فيها أو اتكرر فيها خلال أسبوع او متوسط تكرار السلوك كم مرة
وابدأ اسجل: ايه اللي حصل قبل قيامه بالسلوك وايه اللي حصل بعدما قام بالسلوك
يعني: ( ما قبل السلوك وما بعد السلوك )
حددت السلوك اللي انا عايز اشتغل عليه أو مجموعة السلوكيات واخترت السلوك الاقوى. بعد كده هقيس عدد مرات حدوثه
الخطوة الثانية: سبب السلوك
الطفل احنا اتفقنا انه بيضرب أو يعض محتاجين نعرف ايه الدافع اللي بيخليه يقوم بالسلوك ده؟
عايز احدد سبب السلوك أو الدافع اللي يدفع الطفل أنه يقوم بالسلوك هل الدافع ده: انه شاف حد مثلا بيضرب فضرب زيه؟ شاف حد بيعض؟ او انا وانا بلاعبه بعضه فا هو بيكرر السلوك؟ او بيعكس السلوك؟
هل شاف والده بيعض اخوه او بيضرب اخوه او بيضرب الام فهو بيكرر السلوك؟
هل الطفل ده قام بالسلوك ده قبل كده وضرب اخوه مثلا وانا ضحكت له فالطفل ابتدى يفهم ان ده سلوك سليم فبدأ يكرره
ابدأ اشوف كل الاسئلة دي واحط لها اجابات وابدأ اوصل للدافع الحقيقي للسلوك
تالت خطوة: تحسين البيئة
لازم الطفل يكون عايش في بيئة تدعمه، وتدعم كل أشكال السلوك الصحيح مينفعش مثلا: الطفل قاعد في بيت والاب بيشتم وتيجي تقولي عايز اعدل سلوك الطفل عشان بيشتم ما ينفعش الأب يكون مدخن والام تقول الولد يمسك القلم ويعمل سيجارة.
لازم نحسن البيئة لازم البيئة تدعم الطفل وتساعده على اكتساب السلوكيات السليمة ما يكونش فيها نماذج سلوكية سيئة زي:
التدخين / الكذب
رابع خطوة: الصبر
لازم تصبر على الطفل و متستعجلش النتيجة في فروق بين الاطفال طفل يستجيب بسرعة وطفل ياخد وقت. لازم نفهم اننا بنتعامل مع طفل ولازم ياخد وقته لحد ما يحقق الاستجابة و كمان مينفعش نقارنه بطفل تاني
لكن هل نصبر للنهاية؟
❌ لا لازم تحدد مدة زمنية للخطة زي ما قولنا في الاول بنقيس عدد مرات تكرار السلوك مثلا: كان 10 مرات في الاسبوع بقى 8 → تمام بقى 6 → ممتاز
لكن لو كان 10 وبقى 12 ❌ يبقى في مشكلة و لازم تراجع الخطة.
الخطوة اللي بعد كده: السلوكيات الصحيحة
لازم تركز على السلوكيات الصح وتتكلم عنها مع الطفل
مثال: طفل يكذب ابدأ احكي له قصص عن الصدق احكي مواقف حصلت لك
أو لحد تعرفه و ممكن تألف قصة عن الصدق وفوائده ونفس الكلام مع أي سلوك: بيسرق → اتكلم عن الامانة
النقطة دي تأثيرها قوي جدا لازم كمان:
تنمي مهارات الطفل الاجتماعية وتنمي مهاراته اللغوية وتزيد ثقته بنفسه
لازم تشتغل على كل ده في نفس الوقت
الخطوة رقم 6: التعديل الفوري
تعديل السلوك لازم يكون فوري اول ما السلوك يحصل لازم تعدله ما ينفعش تستنى ساعتين او لما ترجع البيت لازم في نفس اللحظة و كل مرة تشرح للطفل السلوك الغلط ونتائجه والسلوك الصح وفايدته ايه وكرر ده كل مرة
ما تقولش: انا شرحت له قبل كده ❌ لازم تكرر علشان الطفل يربط بين السلوك والتعديل
اخر خطوة: التقييم
يعني ايه التقييم؟ يعني كنت محدد السلوك وقيست عدد مرات تكراره بعد اسبوعين او تلاته و ارجع اقيس تاني و علشان كده لازم تسجل اعمل جدول:
عمود للسلوك عمود لما قبل السلوك عمود لما بعد السلوك وقارن بين النتائج لو السلوك قل → انت ماشي صح
لو زاد → الخطة غلط و لازم تعيد التقييم وتعدل الخطة
ما ينفعش تفضل شغال بدون تقييم حتى لو التحسن بسيط لازم تشتغل اكتر ولو مفيش تحسن راجع الخطة
و بكده احنا اتكلمنا عن الخطوات العملية لتعديل السلوك و لو طفل عنده مشاكل سلوكيه او حابب تعرف ازاي تتصرف أو تتعامل مع سلوكيات طفلك تقدر تحجز استشاره واحنا هنساعدك.