في المقال ده هنتكلم إن شاء الله في موضوع مهم جدا
إزاي نبدأ في تدريب طفل التوحد؟
علشان أبدأ أدرب طفلي، لازم أبقى فاهم:
ابدأ بإيه؟
وإيه النقاط اللي لها الأولوية و الأهمية اللي لازم أبدأ التدريب عليها الأول؟
وبعد كده انتقل لباقي النقاط أو الأهداف؟
يعني إيه الكلام ده؟ يعني لازم تبقى فاهم قبل ما تبدأ تدرب طفلك إن في أهداف لها الأولوية ماينفعش تتجاهلها.
نقطة مهمة جدًا: مش كل التدريب تدريب علشان الطفل يتكلم، يعني أنا مش هبدأ تدريبي من أول يوم إني عايز الطفل يقول كلمات أو يبدأ ينتج معايا كلمات، لا… في نقاط لازم أشتغل عليها قبل كده علشان أوصل للمرحلة دي.
طيب نبدأ بإيه؟ أنا هقول لك تبدأ إزاي:
أول حاجة:
محتاج تعمل تقييم لطفلك
وتحدد إيه المشاكل اللي موجودة عنده
بعد كده نبدأ التدريب بتاعنا، بس عندنا نقاط أساسية لازم تعدي عليها 👇
1. التواصل البصري
هل الطفل ده التواصل البصري عنده كويس ولا لا؟
لو عندك مشكلة → لازم تشتغل الأول على التواصل البصري
2. الانتباه
ابنك بينتبه لما تكلمه ولا لاء؟
بينتبه للنداء باسمه ولا لاء؟
حالات ممكن تشوفها:
طفل سامعك بس مش بيبص ولا بيستجيب !!
طفل مش سامعك أصلاً !!
طفل مش عارف اسمه !!
➡️ لازم تحدد المشكلة وتبدأ تشتغل عليها
3. تنفيذ الأوامر البسيطة
هل الطفل يقدر ينفذ أوامر زي:
خد – هات – امسك
حط دي على الترابيزة
هات الكوباية
هات الكورة
شوط الكورة – ارمي الكورة
حط الكورة جوه الصندوق
فك – ركب (بازل)
➡️ لو ما بيعرفش ينفذ الأوامر البسيطة، لازم تشتغل عليها الأول
4. التفاعل الاجتماعي
هل الطفل يتفاعل مع الأب والأم؟
بيتفاعل مع إخوته؟
لما يكون في تجمع، بيتفاعل مع الأطفال ولا لاء؟
5. الاستجابة والمبادرة
لو حد شاور له أو قال له باي، هل يستجيب؟
لو في أطفال بيلعبوا، بيروح يلعب معاهم؟ ولا بيفضل قاعد لوحده؟
➡️ لازم تقيم:
الاستجابة
المبادرة
الخلاصة 👇 النقاط دي كلها:
ثوابت
لازم تقيمها الأول قبل ما تبدأ أي تدريب تاني
تعمل إيه بعد كده؟
قيّم النقاط دي كلها
لو في نقطة فيها مشكلة → اشتغل عليها
ولو محتاج مساعدة تقدر تحجز استشارة: أونلاين وإن شاء الله نساعدك في حل مشكلة طفلك و نتابع معاك أونلاين خطوة بخطوة.