أهالي كتير ولادهم متاخرين في الكلام، وبتبدأ عندهم الشكوك…
عم الطفل يقول: لا ده الولد ده متأخر ده كده عنده توحد، خالة الطفل تقول: لا ده احنا محتاجين نكشف على الولد ده.
فتبدأ الأم تقلق و يبدا الاب يقلق، ويبدأوا يجروا يمين وشمال علشان يشوفوا ابنهم عنده ايه بالظبط.
هنتكلم عن ايه في المقال ده؟
في المقال ده هنتكلم عن أعراض اضطراب طيف التوحد، ازاي نقدر نحدد ايه الاعراض الموجودة عند الطفل من سن صغير مرورا ببعض المراحل؟
كمان هنتكلم عن الاعراض اللي لو لقيتها ابدأ أقلق و اتوجه لطبيب مختص أو أخصائي مختص، يبدأ يلاحظ معايا الطفل، ويبدأ يوجهني و يفهمني المفروض اعمل ايه و اتحرك ازاي وايه الاجراءات اللي المفروض امشي عليها وهل المفروض ابدآ جلسات ولا لاء.
هل كل الأعراض لازم تكون موجودة عشان اقول ان ابني عنده توحد ؟
في مجموعة كبيرة جدا من الصفات أو من الاعراض اللي ممكن نلاحظها في أطفال اضطراب طيف التوحد، مش بالضروره تلاقي كل الاعراض موجوده عند طفلك،
يعني مش لازم لو هم مثلا 50 عرض مش لازم تلاقي عنده ال 50، مش لازم تلاقي عنده 45. لكن في أعراض انت اول ما تلاحظها لازم تبدأ تشك وتبدأ تتحرك فورا.
خطورة الانتظار: و خلي بالك انك مينفعش تشوف الأعراض وتقول :
لما يكبر هيتحسن، بكره يبطل الرفرفة، بكره يبدا يتواصل معايا بصريا، بكره يبدا يتكلم.
لا… انت ما ينفعش تستنى.
كل ما بدات اتحرك في وقت مبكر كل ما الولد ده هيتحسن معايا في وقت أقرب، وهيبدأ يمر بالمراحل بتاعته وهو مستجيب معايا، او على الاقل وهو متجاوب معايا في التدريب.
من يلاحظ الأعراض أولًا؟
بداية كده، اضطراب طيف التوحد اضطراب الطفل مولود بيه.
اكتر حد هيبدا يلاحظ الأعراض على الطفل ده أو هيبدا يلاحظ ان في حاجه غريبه في الطفل ده هي الأم.
ليه الأم تحديدا ؟ لان الام اكثر حد يتواصل ويتفاعل مع الطفل بداية بقى من:
وهو بيرضع
وهو بياكل
وهي بتغير له هدومه
وهي تلاعبه
وهي بتلاغيه
وعشان كده هي اكتر حد هيقدر يلاحظ اي مشكله موجوده عند الطفل.
طبيعة ظهور الأعراض ؟
الاعراض تظهر منفصلة يعني مش لازم بكره الاقي عنده ٨ أعراض، مش لازم بكره الاقي عنده ١٠ اعراض، ٥ اعراض… لا.
الاعراض تظهر منفصلة، وزي ما قلت مش لازم او مش بالضروره انك تلاقي كل الاعراض موجوده عند طفلك.
مؤشرات مبكرة يمكن ملاحظتها ؟
الام بدايه من عمر شهرين، تقدر تتابع عين الطفل.
الولد ده لما بتيجي ترضعه، الولد ده عينه معاها ولا لا؟ متواصل معاها ولا لا؟
طيب الولد ده لو هى بتلاعبه بحاجة، او في حاجه بتتحرك، أو بتلاعبه بلعبة بتتحرك عينه بتروح على الحاجه دي؟ أو بيحاول يمد ايده مثلا عايز يمسكها او عايز ياخدها؟ ولا الولد مش معانا، او مش منتبه، او مش متواصل مع الحاجه دي؟
التفاعل الاجتماعي :
كمان تبدأ تشوف، هي لما بتلاعب الولد او لما بتضحك له الولد ده بيعمل ايه؟ رد فعله بيكون عامل ازاي؟
تطور الملاحظة مع نمو الطفل:
بعد كده الولد بيكبر شويه عند عمر ست شهور مثلا، تبدأ بقى الأم تشوف هل في تواصل بصري ولا مفيش.
الولد ده متواصل معاها بصريا ولا لا؟ الولد ده لما بتيجي تلاعبه هو باصص لها ولا مش باصص لها؟
طيب لو في اشياء مثلا او العاب بتتحرك، العاب بتنور، عينه تتحرك مع الالعاب دي؟
أهمية التواصل البصري:
لازم نركز جدا على نقطة التواصل البصري.
التواصل البصري من أكبر المشاكل الموجودة عند اطفال التوحد، اه هو مش موجود بنفس النسب، يعني مش شرط ان كل أطفال اضطراب طيف التوحد تلاقي عندهم مشكلة كبيرة أوي في التواصل بصري، لا هو موجود بدرجات متفاوتة.
مفيش طفل زي التاني، مينفعش انا اقيس ان الطفل ده التواصل البصري عنده مش وحش اوي يبقى كل أطفال اضطراب طيف التوحد كده
لأن كل طفل يعتبر حالة خاصة.
ومن أكبر المشاكل زي ما قلت هي مشكلة التواصل البصري.
الانتباه لمصدر الصوت:
بعد كده هتبدأ الأم تلاحظ هل الولد ده بينتبه لمصدر الصوت.
يعني هي لما بتيجي تلاعبه، لما بتيجي تغني له، لما بتسقف جنبه، لما موبايلك يرن جنبه، لما حد بيتكلم بصوت عالي، لو صوت التلفزيون عالي،
الولد ده بيبدأ ينتبه لمصدر الصوت أو يلتفت لمصدر الصوت ولا لا؟
إدراك وجود الأهل :
كمان هتبدا برضو تلاحظ هل الولد ده واخد باله ان دي مامته ان ده باباه.
يعني الولد ده ينتبه لوجود اهله حواليه ولا لاء؟ هل الولد ده بالنسبه له اي حد موجود هو زيه زي بابا وماما؟ ولا قادر يميز بابا وماما؟
الولد ده بيحس ان اهله موجودين جنبه، فيبدأ يبص لهم، بيبدا يتفاعل معاهم، يبدا يضحك لهم، بيبدا يركز مع صوتهم، او يعرف صوتهم ولا لاء؟
الاستجابة للاسم:
شويه شويه الولد بدا يكبر اكتر، بدأ يتحرك أو بدا يزحف أو بدأ يمشي.
هنبدا بقى الأم تلاحظ انا دلوقتي لما بنادي على الولد ده باسمه بينتبه؟
يعني مثلا: الولد واقف بعيد شويه، فقلت يا احمد… هل احمد ينتبه لي؟ يسمع الصوت ويبصلي؟ يسمع الصوت ويجيلنا؟ عارف اسمه ولا مش عارف اسمه؟ طيب لو مش عارف اسمه لما بيسمع صوت… هل الولد ده منتبه الصوت اللي سمعه ولا مش منتبه؟
مهارة التقليد:
كمان هنبدا نلاحظ هل الولد بدأ يقلد فمثلا لما باجي اخبط على حاجه، لما باجي اصفق الولد ده بيقلد زيي؟ يقلد حركة الخبط؟ حركة التصفيق، حركه ان انا ارفع ايدي؟ بيعمل الحركات دي زيي أو بيقلدني ولا لا؟
التقليد الصوتي:
كمان يقلد تقليد صوتي ولا لا؟ لما بقول اي صوت جنبه، لما بحاول الاغيه، بحاول اقول له مقطع صوتي، بقول اي كلمه جنبه، بقلد صوت حيوانات جنبه،
هل بيبدأ يقلد ولا لا؟
لما أشغل له فيديو مثلا على الموبايل او على التلفزيون، سمع صوت عصفور، صوت كلب، صوت قطه، هل هيقلد الاصوات دي ولا لا؟
أمثلة على التقليد في اللعب:
عندنا مثلا ولد تاني في البيت، الطفل ده بيلعب ويقلد صوته، أو يقلد الاصوات اللي هو بيعملها له؟
طيب معانا عربيه وبنلعب، وبنعمل صوت العربية بيب بيب بيب، ونحرك العربية،
بيقلد الصوت اللي احنا بنعمله ده؟ وكمان بيقلد حركة لعبنا بالعربية أو طريقة لعبنا بالعربيه؟ ولا مبيقدرش يقلد؟
تنفيذ الأوامر:
بعد كده ابدأ الاحظ كمان قدرة الولد على طاعة الاوامر او على تنفيذ الأوامر.
يعني انا دلوقتي الولد برضو واقف بعيد عني شويه، فناديته عليه أحمد، انتبهلي تمام ما عندناش مشكلة.
طيب: احمد تعالى… هل احمد هيجي ليا ولا مش هيجي؟
طيب احمد خد الكرة هل هيجي وياخدها مني ولا لا؟
التفاعل والاستجابة :
لو ابنك ماسك الكوره في ايده، وبتقوله له هات الكوره، بيديلك الكوره ولا لاء؟ هل بينتبه ومركز معاك ومصحصح؟ بينفذ الأوامر؟ بيتحرك معاك متجاوب معاك بشكل سليم؟ ولا في مشكله ؟
اللعب واستخدام الألعاب :
هل الولد ده بيعرف يلعب؟ الولد ده بيعرف يستخدم الألعاب بتاعته؟
يعني بيقعد مثلا والالعاب جنبه، وبدأ يمسك العربية يحركها، يمسك المكعبات يركبها أو يفكها، يمسك اي لعبه تانيه يبدا يلعب بيها، يمسك دبدوب… لو هي بنت تمسك العروسه تلعب بيها، هل بيلعب الأدوات بشكل صحيح؟ يعني الولد بيعرف يلعب، وكمان بيعرف يستخدم الأدوات بشكل صحيح او الالعاب بشكل صحيح ولا لا؟
في اطفال ممكن تمسك اللعبة تلعب بيها بطريقه غير اللي اللعبه مصممه ليها،
يعني مثلا عندي مكعبات يمسكها يرميها ممكن نقول ان هو هنا بيستكشف أو بيشوف حركة ايده، يحاول يرمي…بس هل لو انا بديله عربيه وبحرك العربية قدامه، بيمسك العربية ويرميها برضو ولا لا؟ هل الولد ده قادر ان هو يلعب بشكل صحيح ولا لا؟
الانتباه أثناء اللعب:
كمان عندنا نقطه مهمه اوي، لو انت بقى قاعد بتلاعبه…
الطفل ده منتبه معاك؟ يعني متواصل معاك؟ منتبه معاك؟ مركز معاك في اللعبة اللي انت بتلعبها؟ ولا انت في دنيا وهو في دنيا تانيه؟
التعبير عن الاحتياجات:
الولد كبر اكتر شويه، بدأ يحتاج حاجه، لما بيحتاج حاجه يصرخ ويعيط؟ ولا بيشاور لك على الحاجه ؟ لو لسه ما بيقدر يقول اسم الشيء بياخدك من ايدك ويروح على الحاجه؟ ولا اول ما يحتاج حاجه يبدأ يصرخ ويعيط و يرمي نفسه في الأرض أو يخبط راسه في الحيطه؟ ازاي بيتصرف؟ أو ازاي بيعبر لما بيكون محتاج حاجه؟
تطور اللغة :
بعد كده تبدأ تلاحظ الولد ده بقى عنده سنه، سنه وشهرين، سنه وثلاث شهور هل الولد ده بدأ ينتج معاك كلمات؟ بدأ يقول كلمات حتى لو كلمات بسيطه تعبر عن احتياجاته؟ زي: ( مياه - موزه - مم ) أو أي كلمات بسيطه؟
بدأ يقول مثلا اسماء حيوانات، أسماء لعبه بيلعب بيها، أوانت بتلاعبه بها باستمرار؟ ولا مفيش كلمات خالص؟
الروتين والسلوكيات المتكررة :
لاحظ هل الولد ده له نمط معين أو روتين معين ماشي عليه ؟ ولا بيتعامل بطرق مختلفة؟ هل الولد ده عنده لزمات معينة؟
الحركات المتكررة:
هل الولد ده بيرفرف؟ عنده حركة ثني وفرد الجذع؟ بيحرك أصابعه بطريقة معينة؟ بيبص لاي حاجه بتلف ويفضل مركز فيها او سرحان معاها؟
لاحظ كل سلوك طفلك بيقوم بيه.
متابعة الأعراض مع التقدم في العمر:
بدأ الطفل يكبر اكتر، بقى عنده سنه ونص، سنتين، تبدأ تشوف الأعراض، لو كان عنده عرض من الاعراض اللي احنا قلناها:
هل العرض أو السمة دي لسه مكمله مع الطفل؟ هل شدة العرض بتزيد أو بتقل ؟
الانتباه المشترك:
هل لو انت مثلا بتلاعب الولد وبصيت على حاجه معينه الولد ده هيبص عليها هو كمان ولا لا؟
لو الولد محتاج حاجه بيبص عليها وبعدين يرجع يبصلك علشان يقول لك ان هو محتاج الحاجة دي؟ ولا بيتصرف ازاي؟
إبدأ لاحظ: الولد عايز حاجه، بص على الحاجة (عايز الكره مثلا) وبعدين رجع بص ليك، يعني بيقول لك ان هو عايز الكوره دي.
طيب انت بتلاعبه مثلا أو بتشاور له على حاجه بيبص مكان ما انت تشاور ولا لا؟ انت باصص على حاجه، الولد بيبص معاك على الحاجه دي ولا لا؟
التفاعل الاجتماعي:
من النقاط كمان المهمة جدا: الولد ده وضعه او تفاعلاته الاجتماعية عامله ازاي؟ بيتفاعل مع الاطفال؟ لما بيشوف اطفال بيروح يلعب معاهم؟ بيشارك اللعب؟ بيديهم الالعاب بتاعته؟ ولا بياخد الالعاب بتاعتهم؟ بيتصرف ازاي في وجود اطفال ميعرفهاش؟ بيتصرف ازاي في وجود أشخاص كبار ميعرفهمش؟ تبدأ تلاحظ التفاعل عند الطفل لأن نقطة التفاعلات الاجتماعية مهمة جدا جدا.
تطور مهارة التقليد مع العمر:
بعد كده الولد برضوا عمره بيكبر، عدى السنتين، بدأنا بقى نلاحظ إن الولد ده ما كانش الاول بيقلد، دلوقتي لسه برضو عنده مشكله في التقليد؟
ولا بدأ يتعلم ازاي يقلد؟ طيب لو كان عنده مشكله بسيطه في التقليد: المشكله دي اتحسنت أو اختفت؟ ولا المشكله دى بدأت تكبر معايا كل ما عمره بيكبر؟
زيادة شدة الأعراض:
لازم ناخد بالنا ان الاعراض ممكن تظهر بسيطه، وكل ما الطفل عمره بيكبر الاعراض تبدا تزيد حدتها، أو تبدأ شدتها تزيد، أو تظهر بشكل واضح.
أمثلة على تطور الأعراض:
يعني مثلا: ولد عنده مشكله في التقليد، عمره كبر، المفروض ان هو بيقلد بقى حركات اكتر، حركات كبرى، حركات صغرى، مهارات دقيقة، او مهارات حركية دقيقة، الولد ده بيعرف يقوم معايا بالمهارات دي ولا لا؟
طيب ولد مثلا كان عنده رفرفة، الرفرفة بتحصل مرة كل فين وفين،
طيب لما سنه كبر: الرفرفة دي زادت ولا اختفت؟
الولد ده مكانش الاول مثلا بيقلد معايا الأصوات البسيطة طب لما كبر شويه: بدأ يقلد معايا مقاطع؟ بدا يقول معايا كلمات؟
ولا امتنع اصلا عن تقليد الأصوات البسيطة؟
أهمية متابعة تطور الحالة:
كمان ابدا الاحظ: الحاجه دي كانت موجوده شكلها عامل ازاي، ولما كبر شكلها عامل ازاي؟ لاحظ ان انت لما هتيجي تراجع اخصائي او دكتور، لازم تحكي له كل التفاصيل دي، لازم تقول له الطفل ده من اول ما اتولد كان عامل ازاى، وكل مرحله بيعدي بيها كانت الأعراض عاملة إزاي، أو كان وضعه عامل ازاي لأن ده هيفرق جدا في تقييم الطفل وفي تشخيصه.
ملاحظة الانفعالات الغير مبررة:
من النقط برضو المهمه اوى انك لازم تلاحظ انفعالات طفلك الطفل ده ممكن يبقى قاعد مثلا ويعيط كده من نفسه؟ أو لو فاتحين كرتون أو فيلم ممكن يبدأ يعيط لوحده، أو يضحك لوحده؟
كمان تبدأ تلاحظ هل لما هتيجي تلاعبه بيضحك لك؟ أو بيبينلك ان هو مبسوط وفرحان؟ يعني الولد ده عنده القدرة على التعبير عن مشاعره؟
يعني انت لما بتبص له بتقدر تفهم هو دلوقتى زعلان \ فرحان \ غضبان ؟
بيقدر يبين أو يعبر عن مشاعره؟ هل الطفل ده بيقدر يستخدم الانفعالات المناسبة في المواقف المناسبة ولا لا؟
الروتين والتمسك بالأشياء:
هل الولد ده عنده لبس محدد بيفضل لابسه؟ و رافض يغيره او يلبس حاجه غيره؟
هل الولد ده عنده لعبه معينه واخدها معاه وهو نايم، وهو صاحي، وهو بياكل، وهو في الحضانة؟ لو مدخله الحمام بياخد اللعبه دي معاه؟ حتى لو لعبه بايظه، يعني ممكن تبقى بقايا لعبه، لعبه مكسوره، جزء مكسور من لعبه، بس هو ماسكه معاه طول الوقت؟ شنطة مثلا وماسكها معاه طول الوقت، عايز ياخدها معاه في كل مكان؟ او اي لعبه حتى لو حاجه صغيره خالص المهم ان هو عايزها معاه في كل مكان.
الانتباه السمعي:
كمان لازم تاخد بالك من الانتباه السمعي اتكلمنا عنه في فيديو كامل عن مهارات الانتباه ممكن تشوفه المهارات السمعية
الحواس والمشاكل الحسية:
كمان لازم تبدأ تلاحظ حواس الطفل هل الطفل ده عنده مشكلة في اللمس أو الشم؟ الولد ده مابيميزش ما بين الريحه الحلوه و الريحه الوحشه؟
الخوف وردود الفعل:
لازم كمان تبدأ تشوف طفلك: هل الولد ده بيخاف من حاجات ما تخوفش؟
يعني مثلا شكاوى كتير جدا: ان ام مثلا تقول ان الولد او البنت بتخاف حتى من الدبدوب (اللعبة) طيب بيخاف من العربيه؟ اول ما يشوف العربيه مثلا بيصرخ؟ اول ما يشوف الدبدوب بيصرخ؟ اول ما يشوف لعبه كرتونيه او كرتون حتى يصرخ؟ اطفال كتير مثلا بتخاف بشكل مبالغ فيه من الناس، مثلا لو في افتتاح محل، او حاجه بيبقى في الناس اللي هي لابسه شخصيات كرتونية، او أزياء كرتونيه. الولد بيخاف منها جدا، بيترعب اول ما يشوفها، ويبدأ يصرخ نبدا نلاحظ كل الكلام ده.
خصائص اللغة:
الولد ده بدا يكبر وبدأ يتكلم، هل الولد ده عنده الايكولاليا (ترديد الكلام) ؟
اتكلمنا برده في فيديو كامل عن الايكولاليا، وازاي لو الطفل عنده الايكولاليا ( ترديد الكلام / المصاداة ) ازاي نقدر نشتغل معاه بطرق بسيطه خالص تساعدنا في أن الولد يتحسن، واننا نتخلص من الايكولاليا الفورية والمؤجلة.
علاج الايكولاليا عند الاطفال ( الترديد - المصاداه ) Echolalia | أخصائي التخاطب محمد صبري
مشكلات اللغة الأخرى:
ابدا كمان بقى غير الايكولاليا:
محتاجين نلاحظ هل الولد ده عنده مشكله عكس الضمائر؟ الولد ده بيلخبط بين المذكر والمؤنث؟ كلامه نمطي ؟ ولا الامور تمام وما عندناش اي مشكله في الكلام؟
النشاط الزائد:
عايزك تلاحظ هل في نشاط زائد / أو حركة زائدة أو اندفاعية؟
المطلوب من الأهل:
مطلوب منك انك تشوف كل الاعراض اللي اتكلمنا عنها، وتبدأ تلاحظ هل الاعراض دي موجوده عند طفلك.
اول ما تلاحظ الأعراض دي تبدأ تشك، تبدأ تتوجه لاخصائي و تروح تكشف على الولد عند دكتور مختص.
دور الطبيب والتشخيص:
الدكتور ممكن يطلب منك اشعه، يطلب منك تحاليل، الحاجات دي هو بيطلبها علشان يستبعد تشخيصات تانيه زي إن الولد مثلا عنده مشكله في المخ، عنده كهربا زايده.
يبدأ الدكتور يستبعد كل المشاكل دي، ويبدأ يحدد التشخيص السليم بتاع طفلك.
ليه بنتكلم عن الاعراض؟
علشان لو لقيت الاعراض دي عند طفلك تبدأ خطوات الكشف و التشخيص
التدخل المبكر :
كل ما حددت الأعراض بدري، هبدأ الاقي او احدد المشكله بدري و ده بدوره يخدمني في اني ابدأ ((التدخل المبكر)).التدخل المبكر هيكون شامل كل الجوانب، اللي تقدر تشتغل عليها مع الطفل.
الجوانب اللي فيها مشاكل
القصور اللي موجود عنده
السلوكيات اللي ظاهره ومحتاجه علاج
خطورة التأخير:
مستناش بقى لما الولد يكبر، وارجع اقول:
اه ده دي كانت موجوده عنده من وهو عنده ست شهور، اه ده وهو عنده تسع شهور فعلا انا لاحظت عليه كذا، و هو عنده سنه فعلا كان بيعمل كده، يا ريتني تدخلت في سن مبكر، كان الولد اتحسن عن كده.
تأثير العمر على التقدم:
وخلي بالك ان كل ما سن الطفل هيكبر، كل ما يدخل في مرحلة عمرية أعلى والمرحلة العمرية الأعلى لها متطلبات ولها أهداف المفروض الولد يكون محققها.
مثال توضيحي :
يعني ولد مثلا عنده ثلاث سنين لو هنتكلم على الجانب اللغوي المفروض يكون بيقول جملة من ثلاث كلمات، وبيعرف يحكي موقف بس مش بترتيب الاحداث.
فجوة التأخر:
طيب لو انا دلوقتي اتجاهلت مشاكل الطفل ل عمر ٣ سنوات، وهو لسه ما بيتكلمش هكون محتاج اشتغل معاه اهداف الثلاث سنوات و على ما تحقق الاهداف دي، الولد هيكون سنه كبر معايا، بقى مثلا اربع سنين، يبقى انا محتاج متطلبات الفئة العمرية الاعلى اللي هي الاربع سنين وهفضل في الدايره دي الي ما لا نهايه.
الفرق بين تدريب الطفل الصغير والكبير :
كمان لازم نفهم ان انا دلوقتي لو هدرب طفل عمره صغير احسن بكتير ما ادرب طفل كبير فا لو عندي طفل عمره سنتين وبدربه على التقليد، غير لما يبقى عندي طفل عمره خمس سنوات، وما بيعرفش يقلدو لسه هدربه علي التقليد اكيد ده بيحتاج وقت ومجهود اكبر
القرار الصح:
اول ما تلاحظ او اول ما يبقى عندك اي شكوك في طفلك، اتوجه لمختص،
حتى لو قال لك ان مافيش مشكله هتبقى اطمنت، ولو قال لك ان في مشكله، يبقى الحل في التدخل المبكر.
فا لو قلقان أو شايف اي اعراض عند طفلك وحابب تطمن أو لو طفلك اتشخص باضطراب طيف التوحد تقدر تتواصل معانا من خلال حجز تقييم وهنبدأ نحدد المشاكل ونحط خطة علاجية خاصة ب طفلك ونبدأ ندربك تشتغل معاه.