فرط الحركة وتشتت الإنتباه Attention deficit hyperactivity disorder ADHD
-التعريف:
فرط الحركة هو إضطراب سلوكي يصيب الأطفال في سن مبكرة نتيجة خلل عضوي بالمخ يؤدي إلى اضطراب في النواحي النفسية والسلوكية والاجتماعية للأطفال ينتج عنها الكثير من المشكلات.
-الأسباب:
أسباب وراثية.
أسباب طبية من ضمنها : - ضعف صحة الأم بسبب صغر سنها أو معانتها من التدخين أو تعاطي المخدرات. حدوث مضاعفات أثناء الولادة (الولادة المتعثرة / نقص الاكسجين). سوء التغذية للطفل خاصة في الشهور الأولي. الأمراض الوراثية ( تكسر الدم ). إصابات الدماغ ( خاصة حالات الالتهابات والحوادث وغيرها ).
أسباب آخري.
الأعراض :
3 أعراض كبري :
1- ضعف الانتباه والتركيز :
صعوبة في الانتباه والتركيز لفترة طويلة ( ميقدرش ينتبه لشيء واحد ويركز عليه لكن ينتبه لكل المشتتات والمنبهات بنفس القوة).
و هنا نقطه مهمه جدا: يعني ايه تركيز؟ التركيز هو قدرة الطفل على توجيه تركيزه لمنبه واحد فقط من كل المنبهات الموجودة حوله، لكن طفل اضطراب ADHD يتشتت بسرعة ويسيب كل اللي ف ايده ويمل بسرعة سواء بيلعب أو يكتب واجباته.
هنلاحظ كمان انجذابه للأضواء و الإشارات الملونة وكل ما هو مبني على قصة أو دعابة و عنده صعوبة بالتركيز لو في اي صوت حوله.
بالنسبة للتشخيص لو لاحظت 6 علامات من 9 و استمرت عند الطفل لمدة 6 شهور نقدر نقول انه بيعاني من ضعف الانتباه.
ضعف الانتباه للتفاصيل : ( يعني لو الولد ده واقف يكلم زميله وبعد ما زميله مشي سألته هو زميلك كان لابس ايه ؟ ) ميقدرش يفتكر الوان ملابس زميله.
او لو المدرس بيشرح في الفصل هنلاحظ انه فاكر العناوين ومش فاكر التفاصيل وكذلك لو بيحكي قصة.
يفشل في الانتباه لمنبه واحد : يعني ميقدرش يذاكر او يركز لو في ضوضاء او لو بتكلمه في موضوع معين وفي دوشه او اصوات ميقدرش يركز في الموضوع اللي بتكلمه فيه.
يبدو كأنه لايستمع : يعني وانت بتتكلم معاه تبصله تحس انه مش سامعك أو كأنه مش عارف ان في حد بيكلمه.
الفشل في إنهاء الشيء المكلف به لنهايته : لو بيرتب غرفته ميقدرش يكملها للاخر او لو بيعمل الواجب يسيبه قبل ما يخلصه ولو في عمل جماعي مع زمايله يسيبه ويقوم ممكن يرجع تاني بس لازم يقوم.
سوء تنظيم المهام : فوضوي مكتبه متبهدل هدومه دولابه حتى مواعيده غرفته غير مرتبة معندوش التزام ولا انضباط.
يتفادي المهام التي تتطلب جهد عقلي : اصعب المهام لطفل ضعف الانتباه انك تطلب منه يحفظ او يذاكر درس دي بالنسباله مهمه شاقه جدا.
دائما يفقد ادواته : ممكن ينسى ادواته في المدرسه او ينسي مكان ادواته.
تشتت الانتباه بأي مثير خارجي : لو في هدوء وبيذاكر وحصل صوت خفيف هتلاقيه ينجذب للصوت. لو المدرس بيشرح وعمل حركه بسيطه هتلاقيه اتشتت برضو وساب اللي بيعمله حتى لو كان المنبه الخارجي بسيط جدا.
كثير النسيان : ينسي حط حاجته فين او ينسى مواعيده ينسي واجباته.
( محتاجين 6 أعراض من ال 9 ) مستمرين لمدة 6 شهور
2- الاندفاعية :
نقص عام في التحكم في الذات. ميقدرش يستنى دوره. دائما مندفع و عنده ميل لارتكاب المخالفات في أي مكان ( بيت / مدرسة / نادي ) سواء بقصد أو بدون. لو بيتكلم مع حد يقاطع الحديث و مبيستناش اللي قدامه يخلص كلامه. محبط. قليل الصبر. يفقد السيطرة. سريع الغضب في العمل الجماعي.
للتشخيص عندنا 4 علامات لو عنده منهم 1 واستمرت ل 6 شهور نقدر نقول ان الطفل يعاني من الاندفاعية.
يجيب الاسئلة بسرعة وبدون تفكير : لو الاب او الام او المعلم بيسأله سؤال يجاوب من غير تفكير او يرفع ايده قبل ما المعلم يخلص السؤال وكمان ممكن يكون مش عارف الاجابه اصلا.
لا يستطيع الالتزام بدوره : لو في لعبة أو أي نشاط جماعي هنلاحظ انه دايما يتعدي علي ادوار غير و ميلتزمش بدوره ودايما يعم ازعاج انه مش واخد حقه.
دايما يقاطع المتحدث : لو زميله بيكلمه او الاب او الام دايما يقاطع المتحدث ويندفع ويقاطع كلام الآخرين.
دايما بيتكلم حتي لو مع نفسه او مع غيره المهم انه كثير الكلام.
3- فرط الحركة:
فرط الحركه ممكن يكون راجع لمشكلة حصلت أثناء الحمل أو الولادة.
دايما هنلاحظ أن طفل فرط الحركة عنده: قلق صعوبة في الجلوس لأي عمل ينتقل من شيء لآخر بسرعة جدا دائما ما يحتاج للإثارة وعوامل الجذب ( علشان كده بننصح المدرسين باستخدام وسائل تعليمية فيها أشكال و ألوان وإضاءات وعوامل تشويق لجذب انتباه الطفل والا هنلاقي الطفل ده بدأ يتحرك كتير ويخرج من مكانه ويحرك الكراسي او يضايق زمايله ).
للتشخيص عندنا 5 علامات لو الطفل عنده 3 علامات منهم نقدر نقول بنسبة 90 % انه بيعاني من فرط الحركة
يتململ غالبا أثناء الجلوس : يعني لو قاعد عالكرسي يتهز يهز رجليه يلعب ف شعره او يهز ايديه ميقدرش يقعد هادي من غير حركة.
يترك مكانه في الصف دون سبب : لو المدرس بيشرح مثلا تلاقيه قام من غير سبب وساب مكانه وبياخد أدوات مثلا من زميله أو يتحرك او يمسك حاجه يلعب بيها.
يركد باستمرار : دايما يجري وعاوز يتسلق اي حاجه عاوز يطلع فوق الكنبه فوق السفرة فوق المكتب بنلاحظ عنده أن حركته كتير ممكن تلاقيه لو في الشارع عاوز يطلع فوق العربيات.
دايما بيعمل ضجه ويواجه صعوبة في التزام الصمت : اي مكان هيروحه هتلاقي في ازعاج وصوت عالي بيتخانق مع زمايله او يعلي صوته بدون اي سبب لعلو الصوت.
بيعاني من نشاط مفرط : لو خارجين واتفقنا معاه انه يقعد هادي ميقدرش ينفذ ده وحركته سريعه وخطيره.
9 أعراض صغري:
سوء التنظيم : هنلاحظ ان طفل ADHD دايما عنده سوء تنظيم وغير مرتب وبيرمي أدواته في أي مكان ويتصرف كأنه قائد طول الوقت.
ضعف التقدير الذاتي : لو طلبت منه يعمل حاجه بسيطة هيقولك ( مش هعرف / صعبه عليا / خلي فلان يعمل هو ) هنلاحظ أنه بيستصعب كل شيء وينتقد انجازاته باستمرار ودايما بيركز علي السلبيات.
السلوك العدواني: عدوان ( لفظي / بدني ) أو حدة في التعامل مع الآخرين.
العلاقات السيئة مع الأخوة و الأقارب : هلاقيه دايما بيشتكي ان اخواته مبيحبهوش أو زمايله كارهينه محدش بيلعب معاه او محدش عاوزه معاه في العمل الجماعي وده طبعا ناتج عن سلوكه العدواني. وهي سبب العرض رقم (5).
عدم القدرة على الانسجام والتكيف مع المحيطين به :
قلق مستمر : بسبب ضعف تقديره لذاته وعدم قدرته على التكيف ولانه شايف ان محدش بيحبه أو حابب وجوده او حتي عاوز يتكلم معاه.
محاولة استعطاف الآخرين : دايما يتدعي الظلم أو يخاطر لجذب انتباه الآخرين ( يطلع فوق شجرة / يقف قدام عربية ) يقوم بأي سلوك خطر علي حياته.
الميل لأحلام اليقظة أو نلاقيه بيكلم نفسه كتير.
كثير النسيان : لأن عنده مشاكل في الذاكرة بسبب ضعف الانتباه و التركيز.
لو الطفل عنده 90 % من الاعراض دي فا هو مصاب ب ADHD