تفتكر لو طفل واقف قدامك وماسك سكينه ينفع تستخدم معاه فنيه الاطفاء ولا ما ينفعش؟
النهارده ان شاء الله هيكون اول مقال نتكلم فيه عن فنيات تعديل السلوك، وأول فنية هنتكلم عنها النهاردة هي فنيه سهله جدا و بتستخدم كتير وكلنا ممكن نستخدمها ببساطة ومع سلوكيات كتير جدا، وهي فنيه (( الإطفاء ))
معني الإطفاء؟
الإطفاء بكل بساطة ان انا عندي سلوك بيحصل بمعدلات عالية جدا، ببدأ أقلل السلوك ده فيبدأ يقل معايا بالتدريج، يعني السلوك ده لا يختفي مرة واحدة، لا انا ببدا اطفي السلوك تدريجيا.
بشكل أبسط: انا عندي سلوك الطفل بيعمله، عملت تقييم وبدأت اقيس عدد مرات حدوثه، لقيت مثلا انه بيحصل 30 مرة في اليوم، بدأت اشتغل بفنية التجاهل ، فبدأ يقل 25 / 20 / 15 لحد ما يوصل صفر ، اول ما يوصل صفر يبقي كده السلوك انطفى.
الإطفاء له جانبين
1- إطفاء السلوك 2- اطفاء المعزز
اولاً: إطفاء السلوك
عشان نفهمه بشكل بسيط، هنفترض ان عندنا طفل يبكي، والام تتجاهل البكاء
الطفل بيبكي علشان يلفت الانتباه، لو الام عملت له اللي هو عايزه، الطفل هيفهم ان العياط = تحقيق الطلب
لكن لو الام تجاهلت، السلوك هيقل تدريجيا.
و ده بيتكرر في مواقف كتير:
طفل في السوبر ماركت عيط → خد اللي هو عايزه طفل قدام محل لعب رمى نفسه → جبت له اللعبه
انت كده بتدي له المفتاح اللي يتعامل بيه معاك
الإطفاء له اسم تاني وهو التجاهل أو المحو بس لازم يكون تجاهل مخطط له، مش عشوائي يعني مينفعش الاب يتجاهل والأم تعمل العكس، لازم كل اللي بيتعاملوا مع الطفل يستخدموا نفس الطريقة.
الهدف من الإطفاء
ان انا اوقف التعزيز اللي بيخلي السلوك يتكرر
يعني بدل ما ازود السلوك، ابدأ اتجاهله لحد ما يختفي
ثانياً: إطفاء المعزز
في البداية بنستخدم المعززات بشكل مكثف لكن بعد ما الطفل يتقن المهارة، بنبدأ نقلل المعززات تدريجيا بدل كل استجابه → معزز تبقى كل 3 استجابات → معزز بعدين 5 → 10 أو حسب الوقت.
لحد ما نوصل لمرحلة اسمها (( الاقتصاد الرمزي ))
يعني الطفل ياخد نجوم، وكل عدد معين من النجوم يستبدلهم بمعزز
مميزات فنية الإطفاء
تنفع للاطفال الطبيعيين ولذوي الاحتياجات
سهلة التطبيق
بتقلل سلوكيات كتير بتتعزز بالانتباه لها
عيوب فنية الإطفاء
صعب تتجاهل سلوك بيتكرر كتير
النتائج تدريجية ومش فورية
ممكن يظهر سلوك عدواني مؤقت
ممكن السلوك يرجع تاني (الاستعادة التلقائية)
لازم كل المحيطين بالطفل يطبقوا نفس الأسلوب
الخلاصة
الاطفاء مش مجرد تجاهل وخلاص، ده اسلوب محتاج تخطيط وصبر وتعاون من كل اللي بيتعاملوا مع الطفل.
السؤال المهم
لو طفل واقف قدامك ماسك سكينة… هل ينفع تستخدم معاه فنيه الاطفاء؟ 🤔