ابنك خجول ومنطوي مش بيتكلم ولا بيتفاعل مع حد ؟
في البداية مهم انك تفهم ان الخجل مش عيب ومش مرض، المهم احنا نعرف إزاي نتعامل معاه خليني اقول لك مجموعة حلول
اولا : ما تضغطش على الطفل
لما يكون في تجمع او وسط ناس جديده او ناس بيشوفهم بس على فترات بعيدة، حاول ما تضغطش عليه وما تقولوش بقى روح سلم على فلان، اتكلم قول له ازيك، قول له اكلت ايه، الضغط مش هيحل المشكلة بالعكس الضغط هيزود المشكلة وهيخلي الولد قلقان اكتر ومتوتر أكثر فبالتالي الخجل هيزيد.
ثانيا: شجعه يتكلم مع واحد من أصحابه
اختار واحد تكون شايف ان ابنك بيحبه او بيحب يلعب معاه وأبدأ شجعه على أنه يتكلم معاه، ابدا زود المواقف دي بالتدريج بعد كده بس لما تلاقي استجابة في البداية.
ثالثا: امدح المحاولات
لو لقيته في موقف معين متفاعل مع الناس، حد بيساله اسمك ايه فجاوب، حد بيقول له ازيك او عامل ايه فجاوب عليه، ابدأ امدحه على كل محاولة من المحاولات دي ده هيحفز الطفل اكتر على أنه يكرر نفس السلوك
رابعا: صاحب طفلك
اسمعه كويس من غير مقاطعة او سخريه لان الطفل الخجول محتاج يطمن ويحس بالأمان عشان يتكلم و يتفاعل.
علمه مهارات التواصل علمه ازاي يبدأ المحادثة ازاي يتكلم مع حد ازاي يتعامل مع الناس ازاي يبص في عين اللي بيتكلم معاه وازاي يطلب باسلوب كويس، جرب تعمل ده من خلال اللعب التخيلي.
دخله في أنشطة جماعية خليه يلعب رياضه بس تكون لعبه جماعيه واعمل له انشطة جماعيه بينه وبين اطفال تانيين موجودين عندكم او اطفال في تجمع عائلي، خليه يعرف دوره ويلتزم بالدور ويشارك معاهم ويتفاعل معاهم ده هيحفز عنده انه يتكلم ويتفاعل مع الأشخاص المحيطين بيه.
خامسا: خليك قدوة
لو ابنك شافك بتتعامل مع الناس بثقة بتتعامل مع الناس بطريقه كويسه بتتفاعل مع الناس بتتكلم ما بتقلقش ما بتتوترش وبتعرف تدير حوار هيبدا يقلدك ويعمل زيك
سادسا: ما تقولش عليه خجول قدام الناس
ومش كل ما يكون معاك في مكان تبدا تقول والله اصل هو ما بيتكلمش مع حد والله، اصله بيتكسف يسلم على الناس، معلش اصل هو بيتكسف شويه، متقولش الكلام ده قدامه لانك بتثبت الفكرة في دماغه وانت كده كأنك بتوصل له فكره ان انا برر لك فأنت كمل في نفس الطريقة اللي بتتعامل بيها.
سابعا: شجعه ينجح
لو بيعمل اي نشاط رسم تلوين اي لعبه بيلعبها ونجح فيها شجعه ولو وصل لنسبة قريبه من نسبة النجاح يعني كان عايز مثلا يلون رسمه لونها يعني 60 او 70% كويس شجعه برضه، التشجيع هيزود ثقته بنفسه وثقته بنفسه لو زادت مش هيتكسف ومش هيكون خجول فشجعه ينجح لان النجاح بيبني ثقه والثقه بتكسر الخجل
ولو الموضوع شديد قوي ومأثر على حياته اليومية وباين وملحوظ في المدرسه ومأثر على دراسته فما تتأخرش انك تستشير اخصائي تخاطب او اخصائي نفسي
خليك فاهم ان الخجل ممكن يبقى نقطه قوه لو اتعاملت معاه صح لان الطفل الخجول بيكون حساس مستمع اكتر بيفكر قبل ما يتكلم او قبل ما يتصرف ودورنا اننا نساعده يوازن ما بين الخجل وما بين الثقة بالنفس 👍