هنتكلم إن شاء الله عن مجموعة نقاط، لو عملتها هتكون أخصائي تخاطب وتنمية مهارات شاطر:
أول حاجة: لازم تكون فاهم نظري كويس جدًا، وفهمك للنظري مش بس إنك عملت دبلومة أو عملت كورس معين، لا لازم تكون بتطور من نفسك، لازم تكون عملت دبلومة أو عملت كورس، وتكون كمان بتتفرج على فيديوهات تعليمية أو فيديوهات شرح، لازم تكون بتكمل دراسات عليا في جامعة، لازم تكون بتشتغل على نفسك وتطور من نفسك.
طيب بعد ما درست نظري: تبدأ تهتم بالتدريب العملي، لازم تنزل تدريب عملي مدة كبيرة، لازم تبدأ تختلط بالحالات، لازم تبدأ تحتك بالحالات الصعبة، تبدأ تتحط مع حالات سهلة، تبدأ تشوف الحالات دي بنشتغل معها إزاي، تبدأ تشوف الأخصائي اللي بيدربك بيعمل إيه، إزاي بيتعامل مع الطفل جوه الجلسة، إزاي بيدير الجلسة، وده اللي هنتكلم عنه في مقالات جايه إن شاء الله.
لازم تبدأ تتعلم من الأخصائيين اللي بيدربوك، تبدأ تاخد من كل واحد طريقة أو أسلوب، وفي النهاية تبدأ تبتكر طريقتك الخاصة، لأن زي ما إحنا عارفين التخاطب قايم على الإبداع والابتكار، فهتبدأ في النهاية أو توصل في النهاية إنك تبتكر طريقة خاصة بك أنت، تبدأ تشتغل بها مع الحالات.
كمان لازم تكون فاهم إن التدريب العملي ده هو اللي هيخليك تكتسب مرونة مع الحالات، تبدأ تعرف تتعامل مع الحالات، تبدأ تشوف إزاي أخلي الطفل ده يتفاعل معي، إزاي أخلي الطفل ده يتجاوب معي، إزاي أوصل مع الطفل ده إنه يحقق الهدف المطلوب أو إنه ينجز الهدف اللي أنا بشتغل عليه.
تالت حاجة: عملية الإقران عملية الإقران هي إنك تحاول تبني علاقة مع الطفل، وتخلي الطفل ده يبدأ يثق فيك كأخصائي، يعني يبدأ يحب يشتغل معك، يكون حابب الجلسة بتاعتك، يعني المفروض إنك توصل في مرحلة معينة إنك تكون أنت المعزز بتاع الطفل، الطفل أول ما يشوفك بيبقى حابب إنه يدخل الجلسة، بيوصل في وقت معين إنه هو حابب أو إنه مستني ميعاد الجلسة بتاعتك، لو أنت بتروح له البيت أو لو بيجي لك المركز، فحاول تهتم وتركز على عملية الإقران.
طيب إزاي هوصل أو إزاي أحقق عملية الإقران؟
ممكن أحققها من خلال إن أول ثلاث جلسات ألعب مع الطفل كتير، أشوف هو بيحب إيه، أعرض عليه ألعاب كتير، أشوف إيه المعززات بتاعته، و أشوف إيه المدخل بتاعه أو إيه المدخل المناسب للطفل ده.
أهم حاجة إن أنا أحاول أنجح في عملية الإقران.
رابع نقطة: مش عايزك تستعجل، يعني مش مجرد ما تخلص الدبلومة أو تخلص الكورس تيجي تقول لي والله إيه الخطوات اللي أعملها عشان أفتح مركز، لازم تشتغل على نفسك أكتر، تطور من نفسك أكتر، تتدرب عملي مدة كافية، تشتغل سنة واتنين وتلاتة، وتكتسب الخبرة الكافية إنك تقدر تاخد خطوة زي دي.
لازم تكون فاهم إن الطفل اللي أنت بتشتغل معاه، أنت ما بتجربش فيه، الوقت اللي هيضيع وأنا بشتغل مع الطفل من غير خطة علاجية سليمة أو من غير ما أكون بشتغل في خطوات أو ماشي في خطوات تخليني أتقدم مع الطفل ده أو تطور من مستواه، الوقت ده أنت هتتحاسب عليه.
يعني لازم تراعي ضميرك في الشغل مع الحالات، لازم لما أجي أشتغل مع حالة أكون عارف إن أنا هعرف أوصل معاها للنتيجة اللي أنا عايزها.
وبما إننا ذكرنا موضوع الخطة العلاجية: يبقى لازم نأكد على نقطة مهمة جدًا وهي إنك لازم وإنت بتشتغل مع الحالة تكون شغال بخطة علاجية، يعني لازم تكون عملت تقييم للحالة، بعد كده عملت الخطة العلاجية بتاعتك، حطيت فيها الأهداف اللي أنت المفروض تشتغل عليها مع الطفل.
مينفعش تشتغل مع الطفل بشكل عشوائي، مينفعش تيجي النهارده تقول آه والله أنا هدخل الجلسة الطفل ده معندوش تواصل بصري يبقى أنا هشتغل على التواصل البصري الطفل ده عنده اضطرابات نطق يبقى أنا هشتغل على اضطرابات النطق الطفل الفلاني عنده ما اعرفش ايه النهارده مش منتبه معايا يبقى هشتغل على الانتباه، ده المره اللي فاتت ما عملش كذا يبقى اشتغل على كذا ده كده شغل عشوائي.
أنا لازم أعمل تقييم كامل للطفل، أبدأ أحدد إيه المشاكل اللي موجودة عنده، أبدأ أبني خطة علاجية مناسبة للطفل، أحدد فيها إيه الأهداف اللي أنا هشتغل عليها وتحت كل هدف أحدد الأنشطة اللي أنا هشتغل من خلالها.
كمان بما إننا اتكلمنا عن الأهداف والأنشطة:
لازم تفهم نقطة مهمة جدًا لازم تنوع في أدواتك، ما فيش أخصائي معاه بازل واحد للهدف، يعني ما ينفعش أكون أنا عايز أشتغل على الفواكه ومعايا بازل واحد بس للفواكه مثلًا، لا لازم يكون معايا بازل واتنين وتلاتة، ما ينفعش أدرب الطفل بمجسم التفاحة وخلاص كده هي دي التفاحة، لا أنا لازم أدربه بالمجسم ولازم أدربه بالبازل وبازل تاني الشكل فيه مختلف وانوع في ادوات وأنشطة تانيه كمان
كمان: لازم يكون معاك استماره للاستجابات، استماره انت داخل بها الجلسه كاتب فيها والله انا النهارده هشتغل على الهدف الفلاني والخانه اللي بعدها مكتوب فيها استجابة الطفل والخانه اللي بعدها انجاز الهدف.
الطفل النهارده اشتغل معايا على الهدف ده كويس هكتب استجابه جيده، الطفل النهارده أتقن الهدف معايا هكتب تاريخ انجاز الهدف وأسجل التاريخ ،ده ببساطة لأن ذاكرة الإنسان ما ينفعش اعتمد عليها.
ما ينفعش تعتمد على الذاكرة انت لو بتشتغل النهارده مع حالة، بكره هتكون بتشتغل مع عشرة. طيب وانا بشتغل مع حاله انا فاكر بقى لانها اول حاله اشتغل معها فأنا فاكر عنها كل حاجه فاكر كل التفاصيل بسجل كل حاجه في دماغي لكن لما يبقى معاك عشر حالات هتنسى.
طيب لو ما بقاش معاك عشر حالات برضو سجل الاستجابات و اسجل ملاحظاتي عن الطفل. الطفل النهارده في الجلسة ظهر منه سلوك معين اسجله، الطفل النهارده استجابته كانت كويسه اسجل ان الاستجابة كانت كويسه، طفل النهارده مكانش في أحسن حالاته اسجل ان الطفل النهارده ما كانش في أحسن حالته.
علشان تكون اخصائي ناجح: لازم تشرك الأهل في العملية التدريبية لازم تعرف ولي الأمر ايه الاهداف اللي انت شغال عليها وكمان تدربه على تطبيق الأهداف و تعرفه الهدف ده هيشتغل عليه ازاي مع ابنه او بنته و تعرفه ايه الادوات اللي ممكن يشتغل بيها.
و لو ظروفه متسمحش انه يشتري الادوات عرفه الأدوات البديله يعني مثلا لو انت شغال مع الطفل على لضم خرز في خيط ولي الامر مش محتاج يشتري الخرز ممكن يجيب كيس مكرونه ويجيب خيط و يعلم الطفل يلضم او يدرب الطفل على اللضم.
لازم كمان تفهم: ان مش كل الادوات لازم تكون غاليه، ممكن انت تعمل ادوات ابدأ دور ابدأ شوف الأداه اللي انت محتاجها او الهدف اللي انت محتاج تشتغل عليه ايه الأداه اللي ممكن تساعدك في تحقيقه وفي نفس الوقت طب انا ايه الاداه اللي انا ممكن ابتكرها او ممكن او ممكن انا اعملها واشتغل بها على الهدف ده ابدا دور وابتكر ادوات خاصه بك.
نقطه تانيه مهمه قوي: وهتعجبكم جدا انا متاكد قدر شغلك وقدر مجهودك يعني لو شايف ان مجهودك يستاهل مبلغ معين اطلب المبلغ اللي انت عايزه ده بس في نفس الوقت خليك رحيم بالأهل يعني لو انت بتشتغل مع ناس ظروف وما تسمحش انهم يدفعوا لك مفيش مشكله لو جيت على نفسك شويه.
ولو بتشتغل مع حالة والامكانيات مش مساعده مفيش برده مشكله لو جيت على نفسك شويه بس برضو قدر مجهودك علشان تكون بتشتغل مع الحالة وانت حابب الشغل مش وانت مستقل الفلوس.
وبرضو ما فيش حاجه اسمها انا هشتغل على قد فلوس الحاله لا انت ارتضيت المبلغ اللي اتفقت عليه مع عملية الأمر يبقى انت مطلوب منك انك تشتغل بكل طاقتك وبكل اللي تعلمته او بكل اللي تقدر عليه مع الحالة طالما ارتضيت خلاص انت المطلوب منك انك تشتغل مع الطفل وكأنك اخد اللي انت طالبه بالظبط.
وآخر نقطة: عايز اقولها لك ساعد غيرك دايما ومتوقفش المعلومه عندك اتعلمت حاجه وشايف حد ميعرفهاش علمها له اتعلمت حاجه وواحد صاحبك أو واحد بيشتغل معك في المركز بيسالك عنها ما تقولوش ما اعرفش ساعده وعلمه زي ما انت اتعلمت ولقيت اللي علمك علم غيرك وساعد غيرك ما فيش حد هياخد رزقك ولا انت هتبقى عارف كل حاجه وباقي الناس مش عارفه ده مش هيحصل خليك انت احسن وساعد غيرك وعلم غيرك وعلم أولياء الأمور ازاى يشتغلوا مع اولادهم حتى لو ده هيخليهم في وقت من الأوقات يستغنوا عنك ما فيش مشكله رزقك هيجيلك المهم ان انت تساعد غيرك وتعلم غيرك ماتبخلش على حد ب أي معلومه.