العض سلوك شائع جدا عند الاطفال، خاصه الاطفال اللي ما بين سن سنه ونص لخمس سنين وده بيحصل لأسباب كتير
أهمها:
نقص مهارة التعبير اللغوي: بمعنى ان الطفل ده يكون لسه بيتعلم الكلام او لسه معندوش لغه تساعده في التعبير.
فبدل ما يقول: أنا محتاج، أنا عايز، أنا غضبان، أنا تعبان، أنا موجوع فيستخدم العض كطريقة للتواصل
ثاني سبب: (التسنين)
العض ممكن جدا يكون رد فعل على آلم التسنين الطفل ده موجوع فبالتالي بيعض في أي حاجه أو أي حد قاعد جنبه.
ثالث سبب: (الحماس او الغضب)
الطفل ده حاسس بمشاعر كبيرة عليه فمش قادر يعبر عنها بالكلام فيعبر عنها بجسمه.
رابع سبب: (ان الطفل ده يكون محتاج انتباهك)
أنت مشغوله عنه او مشغوله في الحاجات اللي بتعمليها في البيت وهو محتاجك تقعدي معاه او تلعبي معاه فبيبدا يلجأ للعض كطريقة بيوصل لك بيها انه محتاجك خاصة لو: لما يعضك بتتكلمي معاه وتسيبي اللي بتعمليه و تتواصلي معاه حتى لو بالزعيق مجرد انك بتزعقي له انت كده بتدي له الانتباه اللي هو عايزه
اتاكد ازاى ان ده السبب؟
لو لقيتي أن: لما الطفل بيعضك وتتكلمي معاه بيهدى وما بيعضش تاني يبقى غالبا ده السبب.
خامس سبب: (محاكاة الآخرين)
يعني: في حد قدامه بيعض → بيقلده او حد بيلعب معاه بالعض فالطفل بياخد السلوك ويكرره
الخلاصة: العض سلوك شائع جدا خاصه لحد سن 3 سنين وبيقل تدريجيا مع: ✔️ كبر الطفل ✔️ تطور اللغة لان الطفل بيبدأ يعبر بالكلام
طيب لو الطفل بيعض اتصرف ازاي؟
اول حاجة: لازم تاخدي رد فعل واضح وقفي السلوك وقولي ما تعضش، العض ده مؤلم، دي حاجه بتوجعنى
ثاني حاجه: خدي الطفل بعيد عن الموقف بهدوء وابدأي اعملي معاه نشاط تاني او العبي معاه
ثالث حاجه: اختاري وقت هادي وانتي بتلعبي معاه وابدأي اتكلمي عن سلوك العض ووصلي له انه: سلوك مؤذي
مهم جدا ❌
❌ ما تعضيش الطفل كرد فعل ❌ ما تعاقبيهوش بعنف ❌ ما تزعقيش ❌ ما تطلقيش عليه لقب زي “عضاضه”
لان ده: مش هيقلل السلوك و ممكن يزوده
الحل الصح ✔️
علمي الطفل سلوك بديل
علميه يقول: انا زعلان، انا عايز كذا، انا محتاجك، انا موجوع
ابدأي:
✔️ تزودي حصيلته اللغويه ✔️ تعلميه يعبر بالكلام ✔️ تعلميه يطلب ويشتكي
الخلاصة
العض: ✔️ سلوك تطوري شائع ✔️ ليه اسباب كتير (تواصل – احباط – استكشاف)
التعامل يكون: ✔️ بهدوء ✔️ تعليم سلوك بديل ✔️ وضع حدود واضحه
ومع: ✔️ تطور اللغه ✔️ تحسن المهارات الاجتماعيه
السلوك بيبدأ يقل
ولو استمر لازم نستشير: اخصائي تخاطب أو أخصائي نفسي
لو السلوك ده موجود عند طفلك تقدر تحجز استشاره واحنا هنساعدك