من اكتر الاسئلة اللي بتجيلي :ابني عنده توحد؟ أو ابني متاخر في الكلام؟
امتى هيتكلم؟
امتى هسمع صوته؟
امتى هيقول بابا؟
امتى هيقول ماما؟
امتى هيطلب مني لما يكون محتاج حاجه؟
انا قلقانه اوديه الحضانه، علشان لو محتاج حاجه، لو احتاج ياكل، لو احتاج الحمام، مش هيعرف يطلب، ولو حد عمل له حاجه لما يرجع البيت مش هيعرف يقول لي.
علشان نجاوب على الأسئلة دي ، محتاجين نفهم شوية نقط مهمه جدا:
الأول محتاجين نفهم امتى الطفل هيتكلم و ده مش معناه ان انت يبقى كل شغلك على ان الطفل ده يتكلم فقط
يعني ايه؟ يعني انا دلوقتي عندي حاجه اسمها لغة استقبالية
معناها ايه؟ معناها تلقي و فهم و استيعاب الكلام يعني الطفل هيسمعك بتقول موزه هيبدأ ياخد الكلمه ويحاول يفهمها ويستدل عليها
يعني بيبدأ يسمع و ياخد الكلام و يفهم و يستوعب ويحاول ينفذ عليه أوامر او يتصرف على أساس فهمه للكلام ده.
فمثلا:
ابدأ اعرفه على الموزه، اعرفه، التفاحه، الجزمه، الكرسي، السرير واحده واحده.
لما اقول له مثلا: فين السرير؟ يروح عند السرير او يشاور عليه او اقعد على الكرسي → يطلع يقعد على الكرسي
فين الكرة؟ يروح يجيب الكره بتاعته
فين الميه؟ يروح يجيب الكوبايه بتاعته او الازازه بتاعته
فين كذا → يروح يجيبه
يبقى انا هنا الطفل ده سمع الكلمات و فهمها، وكمان بيعرف يستدل عليها او ينفذ الاوامر.
تقليد الأصوات:
بعد كده الطفل ده يبدا يردد أو يقلد معايا الأصوات فا هبدأ ادربه مثلا على تقليد أصوات الحيوانات القطه بتعمل ازاي → ينونو زيها الكلب بيعمل ازاى، البطه بتعمل ازاى
نقلد اصوات العربيات: العربيه بتعمل ازاي → بيب بيب الطيارة، القطر….
يبقى تاني خطوه عندي ان الطفل بيبدا يتدرب على التقليد الصوتي
بداية من تقليد الاصوات و المقاطع
التدريب على الطلب:
اتكلمنا في فيديو كامل على التدريب على الطلبسواء كان الطفل ده عنده اضطراب في التوحد او طفل متاخر في الكلام تقدر تشوف الفيديو شوف الطرق وطبقها ايا كان التشخيص. التدريب علي الطلب و الكلام
يعني لو ابنك مش متشخص بالتوحد أو طفل بس متاخر في الكلام
اشتغل بنفس الطرق اللي انا شرحتها في الفيديو وان شاء الله هتحقق معاك نتائج كويسه جدا.
اللي انا عايزك تفهمه
ان انت دلوقتي مينفعش كأب أو أم يبقى طول الوقت بتضغط على الاخصائي: انا عايز ابني يتكلم المهم ينطق المهم اسمع صوته
طيب ايه المشكله هنا؟
المشكله ان لازم الطفل ده يتدرب على الاستقبالي او على اللغة الاستقبالية يبدا يسمع الكلام يفهمه ويقدر يكمل زي ما انا شرحت
لو الطفل ما أتقنش الاستقبالي ودخل على طول في التعبيري
ايه اللي هيحصل؟
ممكن تلاقي طفلك ماشي في البيت يقول: موزه موزه موزه موزه طول ماهو ماشي سواء شاف موزه او لا، عايزها او لا
بس الكلمه من كتر ترديد الاخصائي او الأب أو الأم الطفل لقطها وبدأ يقولها
بس من غير ما يوظفها.
ممكن يقول: أكل وهو مش جعان، اشرب وهو مش عطشان يبقى هنا المشكله راجعه اللغة الاستقبالية.
يبقى انا دلوقتي:
ما ينفعش استعجل الاخصائي وفي نفس الوقت ما ينفعش الاخصائي يماطل او يزود في الجلسات عشان يطول مدة البرنامج.
انت تابع، راقب و اشتغل مع الطفل في البيت
انا بوضح لك الخطوات اللي الطفل المفروض يعدي عليها و أكد لك تاني ان اهم خطوة في الخطوات دي كلها اللغة الاستقبالية
اللغة الاستقبالية مكملة في كل المراحل ببدا بيها
ولما اشتغل على التقليد الصوتي → موجودة لما اشتغل على الطلب → موجودة التسمية → موجودة المحادثة → موجودة
يبقى انا ببدا بيها وتفضل مكمله معايا لحد اكتمال اللغه
في كل مرحلة: الطفل مطلوب منه الفهم
مثال:
ابنك بدا يقول كلمات مفردة ويستدل عليها، انا عايزه يفهم جملة اقول له: افتح الباب، لازم يفهم الاول علشان ينفذ
ده راجع للغة الاستقبالية.
بعد كده بدا يقول جمله من 3 كلمات و انا عايزه يفهم موقف او لما احكي له قصة ده برضه محتاج لغة استقبالية لدرجه انك لو بصيت في أي اختبار لغه
هتلاقي البنود مثلا: فهم المبني للمجهول وبعدها التعبير عنه يعني دايما الفهم سابق التعبير.
يبقى انت كده فهمت:
ازاي تشتغل مع طفلك وازاي تتابع شغل الاخصائي معاه 👍
ومتنساش لو طفلك بيعانى من اي مشكلة تقدر تحجز استشارة اونلاين وتعرض علينا مشكلة طفلك ونساعدك في حلها خطوة ب خطوة.