إزاي تشتغل جلسة ناجحة مع طفلك؟

ازاي تشتغل جلسة ناجحة مع الطفل سواء كنت أب / أم / أخصائي؟

ازاي تعرف تشتغل الجلسة؟

ازاي تحقق الاهداف؟

ايه التجهيزات وايه الاعدادات اللي انت محتاجها؟

ايه الادوات اللي المفروض تشتغل بيها وازاي تجهزها؟

وازاي تجهز المكان اللي هتقعد تشتغل فيه مع الطفل؟

كل الاسئلة دي و آكتر هنعرف اجابتها في المقال ده ان شاء الله

في البدايه لو انت اب او ام وعايز تشتغل مع طفلك في البيت، ابنك بياخد جلسات في مركز وانت المفروض والصح ان انت بتشتغل معاه لما يرجع البيت

بتشتغل على ايه؟ تشتغل على نفس الاهداف اللي اشتغلها في الجلسة، او الاهداف اللي الاخصائي قال لك والله احنا محتاجين نتدرب على الهدف ده.

ازاي تعرف تشتغل؟ ايه المهارات اللي انت محتاجها او اللي المفروض تكون عندك علشان تعرف تشتغل مع طفل؟ يعني اولياء امور كتير يقول لك: انا مش عارف اشتغل مع الولد، ما بعرفش اقعد معاه. احنا هنتعلم كل الكلام ده.

المهارات اللي لازم تكون عندك: اول حاجه عندنا انك لازم تكون شخص سريع البديهه، لازم تكون قادر على الوصول للطفل في كل حالاته. ابنك النهارده غضبان، زهقان، مقريف، ملوش مزاج يشتغل لازم تعرف تتعامل معاه في كل حالاته. لان ببساطة خالص احنا نفسنا كا كبار مش كل يوم في نفس الحالة المزاجية، انت ممكن تبقى رايح الشغل وانت مش طايق الشغل ولا طايق الناس اللي فيه، احنا لازم نتعامل مع الطفل على الاساس ده.

النهارده هو له مزاج يشتغل فاستجابته كويسه جدا، النهارده هو مقريف. ازاي بقى هخرج من الحالة المزاجية دي؟ ازاي هعرف اوصل له؟ ازاي هعرف اشتغل مع الطفل ده؟ وابدأ كمان افهم الطفل ده ماله أو محتاج ايه، أو ايه اللي هو حاسس بيه، أو ايه اللي هو محتاج ان انا اعمله علشان يبدا يشتغل ويتجاوب معايا؟

كل النقاط دي هتعرف تعملها لما تبدأ تقعد مره واثنين وثلاثه مع الطفل. النهارده انا قعدت معاه من غير ما اشتغل، النهارده جبت الالعاب وقعدت معاه. بدأت اشوف الولد راح على لعبة معينة، يبقى اللعبه دي بتجذب انتباهه. هات اللعبه دي واقعد العب بيها. ابدا ادخل للطفل من المدخل بتاعه. اول ما تلاقي مدخل الطفل، أنت هنا بدأت تمسك الولد ده وعرفت تسيطر عليه، وهتعرف تشتغل معاه بشكل ناجح جدا.

من النقاط المهمة جدا برده انك تقدر تكسب ثقة الطفل ده. يعني ايه؟ يعني الولد يكون حابب كمان الوقت اللي انا هشتغل معاه فيه. انا عايزك توصل ان انت، الولد اول ما يشوفك ويشوفك بتجهز الأدوات وبتجهز المكان، يبقى مبسوط انه هيشتغل. ما يبقاش الولد كل يوم داخل الجلسة بالعياط، كل يوم تيجي تقعد معاه في البيت تشتغل يبقى خلاص يعمل نفسه نايم، يبدأ يتعصب، يبدأ يرمي الادوات، يبدأ يجري منك، يبدأ يروح يمين وشمال ومش عايز اصلا يشتغل معك ولا عايز يقعد معاك.

الكلام ده هوصل له ازاي أو هحققه ازاي؟ تقدر تشتغل على النقطة دي او تحققها من خلال انك تلعب مع الطفل كتير. تبدأ تشوف زي ما قلت في النقطة اللي فاتت ايه الالعاب اللي بتجذب انتباهه وتدخل له من خلالها، وكمان تبدأ تستخدم المعززات مع الطفل. علشان تفهم نقطة المعززات شوف الفيديو ده

المعززات او المحفزات ( الغذائية - الاجتماعية - النشاطية - الرمزية - الذاتية ) و كيفية استخدامها

كمان حاول تبعد عن الروتين. ما تحاولش تخلي شغلك روتيني. مش لازم كل يوم انا قاعد على الكرسي وهو قاعد على الكرسي اللي قدامي: يلا حبيبي ركب على الترابيزة، يلا فك، الصوره دي فيها ايه، يلا ركب البازل، يلا ركب الحلقات، يلا ألضم الخرز في الخيط، ركب اللون الاحمر. لا، مش لازم كده خالص.

اشتغل يوم على الترابيزة، يوم أنشطة حركية، يوم اقعد معاه على الارض، يوم اجروا مع بعض أو اجروا ورا بعض، وانتوا بتحققوا الانشطة او الاهداف اللي انت شغال عليها. مش كل حاجه لازم تكون قاعد، هو ما بيحضرش ماجستير. تتحرك مع الطفل، لاعب الطفل، انزل لمستوى الطفل.

ومن النقاط المهمة جدا بقى انك تكون شخص بيقدر يميز امتى يكون حازم وامتى يكون مرن مع الطفل. امتى تعديله؟ امتى اسايس الطفل؟ امتى اكون حازم و لاء هنشتغل يعنى هنشتغل.

كمان لازم تكون شخص مطلع، شخص بيدور على معلومات جديده، شخص يتعلم كل يوم حاجه جديده او يشتغل على نفسه كل يوم. مافيش حد عارف كل حاجه، كل يوم بنتعلم من بعض. انت ممكن كا ولي أمر أو كأخصائي تبدأ تشوف فيديوهات عندي، عجبك حاجه في فيديو معين خدها طبقها و شوف عند غيري برضو هتستفيد منه حاجه تانيه. ابدآ خد معلومات من اطراف مختلفه، جمع المعلومات دي وشوف المعلومات او شوف الاهداف والانشطة اللي هتخدم طفلك ايه.

ولو كنت اخصائي نفس الكلام، ماتوحدش معلوماتك على مصدر واحد بس. مش معنى كده انك ما ترجعش للفيديوهات بتاعتي، لا ارجع لها تاني. فاللي عايز اقوله ان احنا كلنا بنتعلم من بعض. انا النهارده قلت معلومه في فيديو، هنفترض انها فادت 1%، ال 1% دول خدوها وطبقوها، واحد منهم عمل فكره جديده، انا شفت الفكره دي عادي ان انا اخدها واجربها. ابدا بعد شويه ابتكر انا طريقه جديده او فكره جديده او نشاط جديد واشتغل من خلاله، واحد سالني عنه اقول له اشتغل كذا واعمل كذا بالطريقة الفلانية. يعني ما توقفش المعلومه عندك، وفي نفس الوقت اتعلم من غيرك، كلنا بنتعلم من بعض.

نيجي بقى لنقطه مهمه جدا وهي نقطة البيئة او المكان اللي احنا هنشتغل فيه. مش لازم تكون مجهز مكان في البيت نفس مستوى المركز، انت مش محتاج ده. كل اللي انت محتاجه مكان حتى لو متر في متر او 2 متر في 2 متر، أي مكان هتعرف تشتغل فيه. كل اللي انت محتاجه ترابيزه وكرسى ليك وكرسي الطفل وتبدأ تشتغل.

هتقولي طب ما انت لسه قايل مش لازم نبقى قاعدين على الترابيزه؟ تمام، المكان ده انت بتشتغل فيه وانت قاعد على الترابيزة، عندك مكان اوسع هتعرف تعمل فيه الأنشطة الحركية او هتعرف تتحرك مع الطفل زي ما انت عايز. انت بقى مكانك كبير اعمل كل ده في نفس المكان، اوضه واحده ويبقى فيها كل الكلام ده.

بس في شويه شروط لازم تحاول ان انت تحافظ عليها: اول حاجة الطفل وهو قاعد قدامك يكون باصص لك، وهو باصص لك الحيطه اللي وراك لازم ما يبقاش فيها مشتتات. يعني انا مثلا ورايا في مشتتات، يبقى دي ما تنفعش. طيب اجي انا ابقى قاعد في مكان ضهري او الحيطه اللي ورايا ما فيهاش اي حاجة، الطفل وهو باصص لي ما فيش اي حاجه تشتته عني او عن الهدف اللي انا شغال عليه.

ثاني حاجه لازم اكون قاعد في مستوى نظر الطفل. الطفل ده قادر يشوفني، قادر يشوف تعبيرات وشي، قادر يشوف حركة اعضاء النطق عندي، قادر يركز معايا او يتواصل معايا.

طيب لو الطفل ده شويه شويه اتطور، فبقيت انت بتقعد على كرسي اعلى شويه وهو بيعرف يرفع راسه لفوق، خلاص ما عندكش مشكلة. يعني ما تاخدش الكلام بالشكل الحرفي وتطبقه.

هقول لك نقطه ثانيه بقى عكس كل اللي انت بتسمعه: اغلب الناس واغلب الشغل، وده الصح في البدايه، ان انت وانت بتشتغل مفيش اي اكسسوارات سواء ولد او بنت اب او ام، ما فيش اي حاجه تشتت الطفل، خاصة مع حالات الاعاقات او حالات الاضطرابات الشديدة، حالات اضطرابات طيف التوحد. الكلام ده كله المفروض ان ما فيش اي حاجه تشتت انتباه الطفل.

فلو بنت مثلا اخصائيه بنقول لها مثلا بلاش اكسسوارات كتير، بلاش مثلا خواتم، بلاش حظاظات، بلاش الكلام ده كله. طيب دلوقتي انا هفضل مكمل على كده؟ طيب لو انا فضلت مكمل على كده، الولد ده لما يجي يقعد قدام حد لابس بقى اكسسوارات كتير هيعمل ايه؟ عينة هتروح فين؟

طيب لو انا دلوقتي فضلت شغال معاه، لو اول ما بدا يتحسن معايا شويه بدات انا ابقى مثلا لابس الساعه، اه اول مره عينه بتيجى على الساعة، شويه عينه بتيجى على الدبله مثلا، ايده عينه بتيجى على الاكسسوارات اللي البنت لابساها او الكلام ده كله. طيب مره في الثانيه بدات انا اساعده على أنه يتحرر من التشتت ده او ما ينتبهش للحاجات دي ويركز معايا على الهدف بتاعي.

تمام، انت هنا ماعندكش مشكله. لو مش عارف تعمل ده خلاص بقى استغنى عن كل الاكسسوارات وكل المشتتات. لكن اللي انا بقوله او اللي انا عايز اقوله ان انت كل ما تعلى مع الطفل، عرضه للمشتت علشان تبدا تدربه ان هو يقدر يركز على الحاجة اللي هو شغال عليها بعيدا عن الحاجات اللي موجوده حواليه.

اغلب الناس بتشتغل من غير مشتتات خالص. اسمع اللي انا بقوله وجربه: جاب معاك نتيجه كان بها، ما جابش معاك نتيجه ارجع تاني عن النقطه دي طالما انت مش عارف تحققها. لكن النقطة دي مفيش اي مشكله فيها، بس زي ما اكدت لو الطفل اتطور معاك، لو الطفل ده اتحسن معاك ابدا اعمل النقطه دي واحده واحده.

نقطه تانيه مهمه جدا وغلط كبير جدا ناس كتير بتقع فيه: الادوات لازم تكون جنبك. يعني ادواتك تكون جنبك في مكان الطفل مش شايفها، يعني كرسي جنبك او دولاب ادوات صغير جنب الترابيزه من ناحيتك، الطفل قاعد قدامك مش شايف الحاجات دي عشان ما يتشتت برده في البداية.

طيب هتبدا تاخد الادوات اللي انت عايز تشتغل بيها وتبدا تشتغل مع الطفل. امتى هننهي النشاط؟ اول ما احس ان الطفل ده خلاص زهق من النشاط وهيبدا يفصل، هيبدا يقوم من مكانه ويبدأ يتحرك. انا اللي هنهي النشاط، لازم انت دايما اللي تنهي النشاط. اسحب الأدوات بتاعتك، ابدا غير الموقف، وابدا اشتغل نشاط تاني او على هدف تاني.

نوع في الأنشطة بتاعتك لكل هدف. يعني مش معنى انك عايز تشتغل على الفك والتركيب يبقى هم مكعبين اصفر واحمر اللي معاك وقاعد تشتغل بيهم ثلاث شهور. نوع في الأنشطة جوه الجلسة الواحدة.

مفيش حاجه اسمها كل ما هخلص نشاط هطلع بره الاوضه او اقوم من مكاني واروح اجيب الادوات بتاعه النشاط اللي بعده. انا اصلا بشتغل مع حاله، انا عايز احافظ على التواصل، عايز احافظ على الانتباه، عايز احافظ على التركيز. ازاي هتقوم كل شويه والولد يفصل منك؟ يبقى ده ما ينفعش، ده غلط. و لتفاصيل اكتر عن طرق إدارة الجلسة شوف الفيديو ده ازاي تشتغل جلسة ناجحه مع ابنك في البيت الجزء التاني