إيه هو تأخر النمو اللغوي وإيه أسبابه؟ و كمان هنوضح إزاي نقدر نعالج المشكلة أو إزاي نقدر نحل المشكلة دي، وكمان إيه اللي إحنا ممكن نعمله فنتجنب إن ابننا أو بنتنا تتأخر في الكلام لو إحنا عندنا طفل جديد.
أول نقطة: إيه هو تأخر النمو اللغوي؟ ببساطة خالص، تأخر النمو اللغوي يعني عندنا طفل ما بيتكلمش زي الأطفال اللي في نفس عمره.
طفل عنده ثلاث سنوات المفروض أو الطبيعي إنه يكون بيقول جملة من ثلاث كلمات أو أكثر، ويكون عنده حصيلة لغوية أو مخزون لغويكبير ( عدد كبير من الكلمات ) يعني فوق الـ 300 لـ 500 كلمة.
أنا دلوقتي ابني عنده ثلاث سنين بيقول أقل من كده، فبالتالي هو متأخر في الكلام أو عنده مشكلة ( تأخر النمو اللغوي ).
قيس بقى على كده كل المراحل:
لو طفل عنده سنتين، المفروض إنه بيقول جملة من كلمتين، وعنده عدد مقبول من الكلمات وليكن 100 أو 200 كلمة مفردة.
في أطفال طبعًا هتكون أقل من كده، ماشي مقبول، وفي أطفال هتكون سابقه أو بتقول كلمات أكتر من كده.
ممكن نلاقي كمان إن في بنات سابقة، يعني عندها سنتين ونصف وبتقول جملة من ثلاث كلمات، وعندها عدد كبير جدًا من الكلمات المفردة، وكمان بتسأل كتير أو بتتكلم كتير لدرجة إن الأم تقول إن البنت كلامها كتير خلال اليوم وأسئلتها كتير، هي مش ملاحقة عليها، وده لأن البنات بيبقوا سابقين الولاد شوية في النمو اللغوي، وسابقين كمان في إنهم يكتسبوا النطق الصحيح للكلمات، وكمان بيسألوا كتير، فبالتالي عندهم حصيلة أو مخزون كبير.
ثانيًا: أسباب تأخر في الكلام عند الأطفال؟
أول سبب هو التأخر العقلي: طفل نسبة ذكاءه أو درجة ذكائه أقل من عمره الزمني، بنلاقي مثلًا إن الطفل ده عنده خمس سنوات ودرجته على اختبار الذكاء بتقول إنه متأخر سنتين، عنده فجوة سنتين، يعني عمره العقلي عمر طفل عنده ثلاث سنوات فبالتالي أنا عندي فجوة سنتين ومحتاج أشتغل على المشكلة اللي موجودة عنده علشان أقلل الفجوة دي على قد ما أقدر.
ثاني سبب: ضعف السمع أو مشاكل السمع.
ثالث سبب: الإصابة الدماغية أو الشلل الدماغي.
بعد كده عندنا سبب مهم جدا: اضطراب طيف التوحد، وده سبب مهم لأن كمان أطفال اضطراب طيف التوحد مش بس ممكن يتأخروا في الكلام، لا ده في منهم كمان ممكن ما يتكلمش.
السبب الأشهر: الحرمان البيئي. الحرمان البيئي ببساطة خالص طفل اتولد في بيئة ما فيهاش أي مثيرات ثقافية ولا مثيرات اجتماعية ولا ألعاب ولا في أي حاجة تحفز الطفل ده على النطق.
أمثلة:
طفل مهمل، محدش بيشتغل معاه ولا بيدربه.
طفل ماسك الموبايل طول الوقت، قافل على نفسه ومش بيتفاعل مع حد.
طفل الأب مسافر والأم مشغولة عنه.
طفل متساب قدام التلفزيون من غير تفاعل أو كلام.
خامس سبب: ADHD (فرط الحركة وتشتت الانتباه). طفل فرط الحركة وتشتت الانتباه نتيجة نقص الانتباه اللي عنده وحركته الكتير ممكن ميتعلمش أو ما يكتسبش اللغة.
طيب لو أنا عندي المشكلة دي بالفعل، أعمل إيه؟
أول حاجة:
تعمل للولد قياس سمع.
تعرض الطفل على دكتور سمعيات يطمنك إن الولد بيسمع كويس.
مهم جدًا نفهم نقطة السمع:
السمع زي البصر، ممكن الطفل يكون بيسمع بس مش بكفاءة.
ممكن يسمع الصوت القريب ومبيسمعش البعيد.
ممكن ينتبه للأصوات العالية بس ومينتبهش للأصوات المنخفضة علشان كده لازم كشف متخصص.
ثاني خطوة:
تعرض الطفل على دكتور مخ وأعصاب أو دكتور نفسية وعصبية أطفال يشخص المشكلة.
ثالث خطوة:
تروح لاخصائي التخاطب:
يعمل تقييمات و اختبارات.
يحدد الخطة العلاجية.
يحددلك إرشادات تمشي عليها.
مهم جدًا: نفهم دور كل حد
الدكتور: للتشخيص.
الأخصائي: للتقييم ووضع الخطط العلاجية والتأهيل.
أمثلة:
دكتور يقول شاكك في توحد → تروح تعمل اختبارات.
شاكك في ذكاء → تعمل اختبار ذكاء.
محتاج تقييم لغة → أخصائي التخاطب يطبق اختبار اللغة.
مهم: تمشي بالترتيب
ما ينفعش تتخطى خطوة.
ماينفعش تقول "هو سامع و خلاص".
لازم تقفل كل الأسباب وتطمن.
أهم نقطة: التدخل المبكر
التدخل المبكر يحل مشاكل كتير.
كل ما تبدأ بدري، التحسن أسرع.
كل ما تستنى، الفجوة تكبر (بين العمر الزمني والعقلي واللغوي).
الخلاصة:
أول ما تلاحظ المشكلة، اتحرك.
اعمل استشارة.
حتى لو طلع مفيش مشكلة، أنت كده اطمنت.
ولو في مشكلة، تبدأ بدري وتلحقها.