النهارده إن شاء الله هنتكلم عن فنية جديدة من فنيات تعديل السلوك، بشوف إنها فنية مهمة جدًا خاصة مع الأطفال اللي عمرهم 6 سنوات أو أكتر . وهي فنية التعاقد السلوكي.
من اسمها كده تعاقد يعني عندنا “عقد” أو “اتفاقية”، بتقوم بيه أنت والطفل اللي أنت محتاج تلزمه بسلوك معين أو بتحاول تقلل معاه حدوث سلوك معين. وطالما قلنا إنها اتفاقية أو عقد، يبقى إحنا هنا بنحاول نعلم الطفل ان ده نوع أو شكل من أشكال الدبلوماسية في حل المشاكل، إزاي نقدر نحل المشكلة بشكل بسيط ودبلوماسي.
وطالما قلنا عقد أو اتفاقية يبقى هي عقد ملزم للطرفين: أنا والطفل اللي أنا بشتغل معاه، أو حضرتك وابنك لو بتشتغل معاه على سلوك معين. يبقى العقد ملزم ليك وملزم للطفل، وبيكون مرتبط بالسلوك اللي الطفل بيعمله أو اللي أنت محتاج تبنيه عنده.
وطالما قلنا عقد أو اتفاقية يبقى لها مجموعة أسس أو شروط لازم نلتزم بيها علشان نضمن نجاح العقد ده.
أول شرط: التعاقد السلوكي ده عقد أنا بكتبه أنا والطفل. بجيب ورقة وقلم وبقعد الطفل جنبي، وببدأ أكتب الحاجات اللي أنا عايز الطفل يلتزم بيها أو يعملهاا، وفي نفس الوقت بحدد المعززات و المكافآت، بشرط إن المكافآت تكون مناسبة للسلوك المتفق عليه.
يعني لو متفقين على إنه يلتزم بواجباته، يبقى المكافأة تكون مناسبة للسلوك ده أو للحاجة اللي هو هيقوم بيها.
ثاني حاجة: الاتفاقية أو التعاقد السلوكي يعتمد على التعزيز، وبعيد كل البعد عن التهديد أو التخويف. مافيش حاجة اسمها “لو معملتش هعمل فيك كذا”. أنا هنا عايز الطفل يعمل إيه؟ عايزه يلتزم بالعقد أو بالاتفاق ده من غير تهديد أو تخويف، فقط من خلال المعززات.
ثالث نقطة: لازم يكون في تحفيز أو حث للطفل إنه يبدأ يقوم بالسلوك المطلوب، يعني لازم تدفعه بشكل إيجابي إنه ينفذ السلوك اللي أنت طالبه منه.
رابع نقطة (مهمة جدًا): الالتزام بالتعزيز أو المكافأة. اتفقت معاه إنه لو التزم مثلاً أسبوع بالواجبات هيحصل كذا، يبقى لازم ياخد المكافأة دي. والمكافأة تكون فورية، يعني مفيش “نسيت” أو “خليها لبكرة”، لأن كده أنت بتبوّظ فنية التعاقد السلوكي.
الطفل لازم يلاقيك ملتزم بالبنود اللي عليك عشان هو كمان يلتزم بالمطلوب منه.
الهدف الأساسي من الفنية إننا ندرب الطفل إنه يكون عنده دافع داخلي يلتزم بالعقد، ونخليه يكتسب الإحساس بالالتزام.
ومن خلال التكرار (مرة واثنين وثلاثة)، بنعيد استخدام التعاقد السلوكي، وبنبني عند الطفل إرادة داخلية تخليه يلتزم بالسلوك ده في المستقبل.
كده إحنا بنبني شخصية الطفل، وده هيساعد في تكوين نوع من الانضباط الذاتي.
إمتى نستخدم فنية التعاقد السلوكي؟ نقدر نستخدمها في حالتين:
تقليل السلوكيات السلبية
أو زيادة وبناء السلوكيات الإيجابية
أمثلة على السلوكيات السلبية: طفل بيتأخر في النوم، طفل مبيعملش واجباته، طفل بيعيط عشان ميروحش المدرسة، أو ميروحش الدروس.
أمثلة على السلوكيات الإيجابية: تعليم الطفل يقرأ كتاب، يسمع محتوى مفيد، يلتزم بواجباته، أو يقوم بسلوك إيجابي معين.
الفنية دي مناسبة للأطفال اللي بيعرفوا يكتبوا أو يفهموا بنود بسيطة، وغالبًا نبدأ نستخدمها من سن 6 سنوات.
وفي النهاية، تقدروا تجربوا الفنية دي سواء لتقليل سلوكيات غير مرغوبة أو لبناء سلوكيات إيجابية، وإن شاء الله تجيب معاكم نتائج كويسة جدًا.